Kapamilya derek

CEBU, Philippines — Nahusay na matud pa ang issue tali nila ni Derek Ramsay ug sa mga kadagkuan sa ABS-CBN, human sa iyang kontrobersyal nga paglayat paingon sa TV5. Suma pa ni Derek sa exlusive interview sa www.pep.ph, nag-meeting na sila sa mga kadagkuan sa ABS-CBN ug nahusay na sila. Nasuta matud pa nga usa lang ka dakong wala pagsinabtanay ang nahitabo. Hinuon, giklaro ni Derek nga hangtud sa April 2018 pa ang iyang kontrata sa TV5. Hinuon, aduna siya’y umaabot nga pelikula ubos sa Star Cinema diin makauban niya sila si Paulo Avelino ug Bea Alonzo.

Happy Siya

Dili matud pa apektado si MarieL de Leon sa resulta sa Miss International pageant diin napakyas siya pagsulod bisan sa Top 15 man lang. Suma pa ni Sandy Andolong, nalipay ang iyang anak gumikan sa kasinatian niini didto sa Japan. Namahayag matud pa si Mariel nga dili ka bayran og salapi ang iyang nasinati didto nga naghimo niyang mas mature, gawas pa nga nakabaton siya og daghang mga higala.

Sila pa

Giklaro sa bag-ong Kapuso star nga si Jason Abalos nga sila pa gihapon ang magkarelasyon sa kanhi beauty queen nga si Vickie Rushton. Apan talagsa na lang sila magkita sanglit tua na magbase si Vickie sa Bacolod City sanglit aduna kini giatiman nga negosyo. Kanunay matud pa silang mag-istorya.

Nanaghan ang projects

 Nangangkon si Maria Isabel Lopez nga human sa kontrobersiya nga iyang nalambigitan diin niagi siya sa ASEAN Lane nga wala’y pagtugot, mas nidaghan hinuon ang iyang mga offers nga naglakip sa guestings, teleserye, duha ka pelikula, international movie nga himuon didto sa Japan sunod tuig. Suma pa niya duna na matud pa siya’y bookings hangtud 2019. Apan ang mga netizen nagduda unsa ka tinuod kining maong pangangkon. Alang nila, duna na gyud na matud offer si Maria Isabel sa wala pa ang kontrobersiya—nanghambog lamang gyud ang aktres niining tungora.

Bida na si Sue

Giangkon ni Sue Ramirez nga ang umaabot niyang teleserye, “Hanggang Kailan” diin leading lady siya ni Arjo Atayde maoy tukmang rason nganong nibiya siya sa La Luna Sangre niadtong September. Apan niya pa, dili niya desisyon ang tanan, kondili sa management. Giklaro hinuon niya nga ni-audition siya sa maong role. (BANAT NEWS)