Bailey pasok sa “Now United”
CEBU, Philippines — Opisyal na nga sakop sa global pop group nga “ Now United” ang kanhi "Pinoy Big Brother" housemate nga si Bailey May.
Ang maong grupo gitukod sa sikat kaayo nga personalidad nga si Simon Fuller kinsa nagama sa American Idol ug uban pa nga international competitions ug siya usab ang nag-manage sa Spice Girls.
Kahinumdoman nga nag-agi gyud og lapad nga audition si Bailey aron lang gyud malakip sa maong grupo.
Suma pa sa Instagram post sa Now United, ang maong grupo natukod alang sa mga bag-ong henerasyon ug ang performers niini naggikan pa sa lain-laing dapit sa kalibutan. Si Bailey maoy ika-11 nga artist nga mahimong sakop sa Now United.
Ang mga kauban niya mao sila si Lamar ( United Kingdom), Josh (Canada), Shivani (India) , Heyoon (South Korea), Any ( Brazil), Hina ( Japan) , Noah (USA) , Diarra (Senegal), Joalin ( Finland) ug Sofya ( Russia).
Prinsepe Amante ug Queen Jona mag-iring-iring
Pun-an pa ang kaalegre sa programang Iring-Iring sa Brigada News FM 93.1 nga madungog gikan sa Lunes hangtud sa Sabado (9:30om to 12 midnight), gumikan kay aduna na’y ka- partner si Prinsepe Amante sa maong programa.
Makauban na niya sa maong show sugod karong Lunes, November 20, si Jonalyn Jumabis nga magtangag sa air name nga Queen Jona.
“Excited na kaayo ko, kay palahi napud siya, kay pang-hard news baya ako naandan gyud, pero karon kay lahi na pud nga show. Nakasuway man ko sa una og lahi nga programa nga tambag-tambag. Pero kining Iring-Iring kay lahi man ang format ani--bale duha ka tawo ang mag-ila ila on air,” matud pa niya.
Samtang si Prinsepe Amante sa iyang bahin, gikalipay niya og maayo nga makauban na niya si Queen Jona ug masaligon siya nga mosamot kaalegre ang Iring-Iring nga usa ka tuig kapin na nga nagtikaw-tikaw sa kahanginan. “Daghan na kaayo ang nagkadayon tungod sa Iring-Iring. Mag-ila ila sila on air, pero dapat sa una nila nga panagkita, dinhi gyud sila sa station mag-meet, para pud maseguro ang ilang seguridad,” matud pa ni Amante.
Dugang pa niya nga dako gyud og nahatag nga kalingawan sa listeners ang Iring-Iring ug naghinam-hinam na pud siya sa mga pasiaw nila ni Queen Jona sa kahanginan. (BANAT NEWS)
- Latest