Si Bela gyud diay!

CEBU, Philippines — "Kung handa siya".   Mao kini ang deretsong tubag sa Kapamilya hunk actor nga si Zanjoe Marudo sa dihang gipangutana kini sa host nga si Boy Abunda kung si Bela ba ang iyahang panguyaban sa panahon nga andam na siya makigrelasyon og balik.

Birthday wish ni Jona

Lovelife ug good health maoy gi-wish sa singer nga si Jona Viray atol sa iyahang ika-28 nga adlaw’ng natawhan niadtong Miyerkules. Laing wish niya mao ang kalamposan sa iyahang Prima Jona concert karong Sabado didto sa The Theatre, Solaire Resort and Casino, sa Parañaque City.

Mitubag sa netizen

Gitubag sa aktor nga si Martin del Rosario ang usa ka netizen kinsa nikuwestiyon sa iyahang katakos ug nganong siya ang gihulip ni Christian Bables aron  modala sa papel isip Barbs sa pelikulang Born Beautiful. "Respect is given to people who deserve it. Respect is earned," tweet pa sa aktor.

Pawala sa kaguol

Nagbakasyon silang Jericho Aguas ug ang  anak  niini nga si Hubert didto sa Zambales human sa masulob-ong pagpanaw ni Isabel Granada. Ang amahan ug anak nag-island hopping didto sa kadagatan sa Zambales. Si Jericho maoy ex-husband ni Isabel ug bunga sa ilahang panaghinigugmaay mao ang anak nga si Hubert.

Andam modawat sa silot

Andam matod pa ang aktres nga si Maria Isabel Lopez nga moatubang sa Land Transportation Office kalabot sa kontrobersyal nga pag-agi niya sa ASEAN lane didto sa kalsada sa kaulohan. “Kung ano ang consequences ng action ko, I will take responsibility naman,”  sigon pa sa aktres.

Alyssa nakauyab na

Mapasigarbuhong gi-upload ni Alyssa Quijano sa Instagram ang hulagway kauban ang bag-ong uyab niini nga lalaki. Ang maong hulagway kuha atol sa birthday celebration sa former X Factor Philippines contestant. Si Alyssa maoy ex-girlfriend ni Jake Zyrus diin nikabat og upat ka tuig  ang ilang  relasyon apan nagbuwag sa  miaging tuig.

Nagbalik na?

Nag-share og funny meme photo ang politician-actor   nga si Jolo Revilla diin makita sa maong hulagway silang duha sa ex-girlfriend niini nga si Jodi Sta. Maria. Nakasulat sa maong hulagway ang "joLO & joDI in LODI. Ang tambalang walang kapantay" ug adunay caption nga "Hindi sa sine...hindi sa TV...kundi sa tunay na buhay #PagIbigsaTunaynaBuhay."

"Keeper"

Nag-post sa Instagram og sweet photos ang Kapamilya actress nga si Jessy Mendiola kauban ang uyab niini nga si Luis Manzano. Sa maong post gihulagway sa aktres nga "keeper" matod pa ang  uyab nga si Luis. “You know your boyfriend is a keeper when he comes up to you crying cos he’s happy his friends are getting married,” post pa sa aktres.

First time

Nakasuroy na gyud sa Divisoria sa labing unang higayon ang beauty queen/actress nga si Ruffa Gutierrez aron lang mopalit og Christmas tree. Sigon pa sa post sa aktres nga nagsul-ob siya og face mask, kalo ug sunglasses aron dili mailhan sa publiko. Ang boyfriend nga si Jordan Mouyal maoy nanghagad sa aktres nga mamalit sa pampublikong merkado.

Nasipyat si Ryan

Gibutyag sa host nga si Ryan Bang nga nanghangyo siya ngadto sa higalang aktres nga si Danica Sotto nga dili motaho ngadto sa amahan niini nga si Vic sa iyahang gisulting umaabot nga segment sa It’s Showtime. Wala matod pa kahibalo si Ryan nga anak si Danica ni Vic kinsa host sa kaatbang nga noontime show sa dos nga Eat Bulaga!

Pia hurado sa Miss Universe 2017

Pormal na nga gianunsyo sa Miss Universe Organization ang kompletong listahan sa mga hurado sa ika-66 edition sa Miss Universe nga ipahigayon didto sa Las Vegas, Nevada, USA karong Nobiyembre 26.

Lakip sa mga mamahimong hurado mao  si 2015 Miss Universe Pia Wurtzbach. Kahinumduman nga nag-post ang Kapamilya actress kaniadto nga aduna siya'y special participation sa Miss Universe karong tuiga apan wala niya gitataw kung unsa kini.

Mobalik usab sa  ikatulong higayon isip host si Steve Harvey sa maong prestihiyosong  beauty pageant sa kalibutan.

Makita ang live telecast sa 66th Miss Universe coronation night karong Nobiyembre 27 sa ABS-CBN. (BANAT NEWS)