Viva maoy mo-distribute sa MTK

CEBU, Philippines — Malipayong gipahibalo sa  Heritage Productions nga katambayayong nila ang Viva Films sa pag-distribute  sa pelikulang Magbuwag Ta Kay’ (MTK) nga gibidahan nila ni  Akiko Solon ug Rowell Ucat a.k.a. Medyo Maldito.

Nitambong gyud sa special gathering sa MTKsa miaging adlaw ang  vice president for operations sa  Viva South nga si  Verb del Rosario.

Nagkanayon si  Verb nga social media lang  nahatagan og alamag sa maong lilas  ug nakuryuso siya  gumikan sa talagsaon nga kisaw  niini.

“We started with music and now we want to get in into films. One day, I was browsing through on my Facebook. I saw a post about MTK and I got curious. Eventually they posted a release of the name. I said, it’s a movie pala. Ayun, nagkataon na we did film pitching a few weeks ago”, asoy ni Verb.

Si Verb usab ang mismo nga mihimo og unang lakang ngadto sa Heritage Productions pinaagi sa pagpadala og mensahe niini sa Facebook.

Dakong kalipay ni Verb nga dali usab nga misanong ang executive producer sa maong lilas nga si Sunshine Lim.

“I’m so happy  kasi Viva is part of the industry here and it’s the start of something bigger. Eventually, we are lining up Cebuano films talaga”, padayag ni Verb.

Usa sa nakahatag og interes ni Verb nga ipaubos ang MTK sa Viva  tungod kay  aduna gyu’y makuha nga mga pagtulun-an ang kadaghanan, mapakita niini ang nagkadaiyang lugar  nga  ikapasigarbo sa mga Cebuano.

Gibutyag ni Sunshine  nga unang higayon kini nga mahatagan og oportunidad nga ang usa ka Cebuano film mahatagan og line-up alang sa commercial release sa mga sinehan lukop nasud maong  dako ang iyang pagpasalamat tungod kay adunay maimpluwensiya nga tawo ang miduol gyud kanila.

Ang maong pelikula mopakita kun unsa ang tipikal nga pagpamuyo sa usa ka Cebuano nga pamilya ug pagdala sa usa ka relasyon. Gawas niana, ipakita niini ang nagkadaiyang maanindot nga dapit sa Sugbo. Pipila niini mao ang Mactan, Moalboal, Dumanjug,  Busay ug uban pa.

Sa laing bahin, mipadangat sa ilang pagpasalamat sa kadaghanan ang mga cast sa Magbuwag Ta Kay nga sila si Rio Delizo ug Alem Garcia ug Snake Princess gumikan kay bisan og bag-uhay pa lang sila sa industriya, daghan na ang nakaila ug mihangop kanila.

“A lot of things changed in my life after MTK. Opportunities are showering upon me and blessed kaayo ko karon”, suma pa ni Alem.

Si Rio, isip usa ka film director, alang kaniya, dako og natabang ang maong pelikula tungod kay nabaid usab ang iyang katakus ug nakita usab niya nga dili lang siya kamao modala og kamera apan kamao usab siya nga moarte.

Sa bahin ni Rowell, gipadayag niya nga mauwaw na siya motan-aw sa iyang nawong sa big screen tungod kay kiwawan siya magtan-aw.

“Mauwaw man gae ko motan-aw sa akong nawong sa akong video, unsa pa kaha og sa movie na?” matud ni Rowell.

Bisan og gipagawas ang trailer sa miaging adlaw  didto sa Gerry’s Grill SM City Cebu, nagpahipi gyud sa daplin si Rowell ug gitabunan ang iyang dagway.

Mipaambit usab si Akiko nga sa maong salida, mas gaan ang iyang pamati nga hapit na gyud mapagawas ang MTK. Gani, mas nalipay usab siya sa oportunidad nga gihatag kaniya sa Heritage Productions kay bisan og didto siya nakabase sa Manila. , siya gyud ang gitugyanan nga mohatag sa kinabuhi  sa karakter ni Kay.

Nagmalaumon si Akiko nga unta daghan ang mosaksi sa ilang pelikula karong Nobiyembre 30 sa SM City Cebu tungod kay masaligon siya nga nindot gyud ang dagan sa istorya ug talagsaon ra usab mapakita ang mga senaryo nga ilang nabuhat sa maong  pelikula. (BANAT NEWS)