“Lagari Queen”

CEBU, Philippines — Raket diri, raket didto. Show diri, show didto, samtang duna’y show, go lang nang go!

Mao kini ang kinabuhi nga gitagamtam karon sa nahimong 2012 Sinulog Idol First Runner-Up nga si Danielle May Ozaraga kinsa mas naila karon isip “Lagari Queen”.

Istorya pa ni Danielle nga aduna gyu’y gigikanan ang maong titulo, kay matud pa sa iyang mga higala, iya gyu’ng suklan ang matag show nga itanyag ngadto kaniya.

“Basta makaya lang sa schedule, go gyud dayon ko. Kung pwede gani mag show kada adlaw, why not diba? Basta ma happy ko everytime makaperform samot na if pakpakan ka sa mga tao after performing”, suma pa ni Danielle atol sa iyang pagpakighinabi diri sa Banat News Hugyaw.

Sa usa ka semana, labing menos na ang duha ka show. Dinhi sa atong lokalidad, daghan gyud og mga kalihukan ug mga kasikas nga nanginahanglan og mohatag og mga paukyab o kalingawan.

Ang talento ni Danielle sa pagkanta mao gyud ang pinangita sa mga tawo ilabi na og mga bag-o ug adunay birit nga mga linya.

Si Danielle, kinsa nagtubo sa Danao City, Cebu mibutyag nga sa dihang nag- edad pa siya og 3 anyos, didto na nabatyagan sa iyang inahan nga si Myla Ozaraga nga aduna siya’y abilidad  sa pagkanta.

“Sa una, dad-on ko sa akong mommy sa skwelahan sa Sto. Tomas College-Danao nga iyang gitudluan then iya kong pakanta-kantahon. Ingun akong mommy nga pag-graduation daw nako pag-Kinder 2, wala siya’y idea nga apil ko sa program kay pakantahon ko. Human ato, anha siya nakaamgo nga naa diay koy talent sa pagkanta”, asoy pa niya.

Tungod kay walay igong alamag ang iyang ginikanan sa pagpalambo sa talento nga iyang naangkon,gipa-enrol siya og nagkadaiyang voice lesson classes sa dihang nag-edad siya og 6 anyos.

Bisan og dili kaayo kamao manganta ang iyang mga ginikanan, gibutyag usab niya nga sila ang numero uno niya nga kritiko sa iyang mga performance.

Matud pa ni Danielle, mas dako og gikatabang ang mga kritiko gikan niini gumikan kay matud pa nila nga sila mismo ang labing naminaw ug nakasaksi sa iyang performance.

Sa dihang nagpangidaron na si Danielle og 9 anyos, didto siya una nga nakasalmot og singing contest. Miapil siya sa Little Big Star Cebu Season 2.

Bisan og first-timer pa siya niadto, mitapos gyud siya isip 3rd runner-up sa grand finals.

Wala damha ni Danielle nga didto na magsugod ang maayong dagan sa iyang karera gumikan kay bisan og bata pa lang siya, daghan ang motawag kaniya aron mo-guest sa bisan unsa nga mga okasyon.

Suma pa ni Danielle nga mas malingaw siya og mga show kaysa kompetisyon gyud apan og adunay moimbitar kaniya nga moapil siya sa usa  ka singing contest, dili usab  siya  mobalibad niini  tungod kay nakita niya nga mas malipayon siya nga mokanta atubangan sa kinabag-an.

Niadtong tuig 2012, misalmot si Danielle sa ikatulong edisyon sa Sinulog Idol. Matud pa niya nga siya ang labing bata nga mi-audition niadtong tungura tungod kay 14 anyos pa lang siya.

“Pag-audition, gipangutana ko sa usa mga judges kung ganahan ba gyud ko. Ingon sab sila na it’s still not the right time for me and maybe I can join again the next year. But ni’ng go gihapon ko and luckily I was one of the finalists”, suma pa niya.

Misanong siya nga moapil gyud sa maong edisyon bisan og crucial pa alang sa iyang edad gumikan kay gusto niya pamatud-an nga dili sukaran ang kabata ug kahamtong sa usa tawo aron makigtigi.

“All throughout S.I Season 3 was tough but fun at the same time. Puros gyud sila mga nindut manganta and also, lainlain og genre among kantahon every night so it is very challenging for us plus tinaktakay pa jud from Top 12 to Top 3. Happy pud kaayo ko nga nahimo kong 1st Runner-up. Thankful kaayo ko ani nga experience kay usa ni sa dili jud nako makalimtan  sa akong kinabuhi kay tungod sa Sinulog Idol, nausab gyud ang dagan sa akong kinabuhi”, padayag pa ni Danielle.

Ang labing importante nga nakat-unan ni Danielle sa kompetisyon mao ang pagmintinar sa maayo nga pamatasan nga naglakip na sa insakto nga oras sa pagtunga sa lokasyon kun asa mahitabo ang show o rehearsal, pagtuman sa sabot sa mga tigdumala sa show, ug ang desente nga pagbisti.

Dakong pasalamat ni Danielle sa Sinulog Idol tungod kay nahulma usab siya isip usa ka maayong binuhat ug usa ka propesyonal sa natad sa musika. Gani, daghan ang nisalig kaniya sa pagkuha sa mga pasundayag sa nagkadaiyang dapit lakip na sa laing nasud.

Niadtong miaging tuig, mitikang siya didto saYogyakarta, Indonesia alang sa East Asia Inter-Regional Tourism Forum kauban ang University of Cebu Dance Company kundiin lakip usab siya sa mga mosayaw.

Bag-uhay lang niining tuiga, didto usab siya sa Gang Won, South Korea alang sa Countdown to G-1 Winter Olympics.

“Lingaw kaayo nga experience labi na nag represent ka sa imong country ug gi-showcase sab namo ang lain-lain nga cultural performances. Lingaw kaayo ang taga lain lugar especially inig kanta nako og “I Love Cebu”, suma pa niya

Q AND A

BNH: Unsa ang pinakahugyaw nga nahitabo sa imong kinabuhi?

DANIELLE: During the World Championships of Performing Arts. A Talent Olympics held in Long Beach, California, USA. I was privileged to represent our country and compete with other countries in Vocal Solo Category. Although daghan kaayo nga challenges ang among naagian physically ug labi na financially, it was all worth it in the end because I brought home three silver medals for World Music, Open, and Variety Style and of course dili jud ka bayran ang experience namo didto sa USA.

BNH:Unsa ang imong future plans or goals?

DANIELLE: After I graduate in college, ganahan ko mo-explore more sa field, I want to try theatre and musical plays. Anything basta mag travel-travel, bisag asa nga lugar to perform.

FAST FACTS:

Name: Danielle May Ozaraga

Birthday: 23 November 1996

Address:Danao City, Cebu

School & Course: University of Cebu-Banilad, 4th Year BS-Tourism

Hobbies: Make-up, Shopping

Favorite Food: Korean Food

Height: 5’1’’

Weight: 120 lbs.

Favorite Song: Power by Little Mix

Favorite Genres: Pop, Ballad, RnB, Broadway

Favorite Singers: Mariah Carey, Morissette Amon, Lani Misalucha, Sarah G., Regine

Favorite K-Drama: Goblin

Motto: Go for it, no matter how it ends----it was an experience.

Titles/Achievements in Life:

• ABS-CBN Little Big Star Cebu, 3rd Runner-Up

• 4th Halad sa Kabataan Vocal Solo, Grand Champion

• Sinulog Idol Season 3, 1st Runner-up

• 6thHuniño Finalist

• Cebu Pop Music 2017, Finalist

• Philippines’ Official Representative and Multi-Silver Medalist during the 19th Annual World Championships of Performing Arts held in Long, Beach, California, USA last July 2015