Banned ang Handler!

Hugyaw nga Domingo mga KaBisChika! Pila nalang ka adlaw...Pasko na! Apan sa dili pa magPasko padayon ang atong mga Kinsa Siya Insider para muhatod kaninyo og mga BisChika. Busa panukad na kay ania na ang Kinsa Siya!!!

Usa ka local handler ang gihungihong sa usa ka event organizer nga dili na paapilon sa mga screenings nila. Kay ngano? Kun ang iyang mga talent dili masulod o makasulod man gani sa competition unya dili makadaug kay magbuwa buwa ang baba! Mura’g nakakaon og sabong panglaba mag best in wayway, ( yawyaw). Mao na ni karon gusto diay aning local handler iyang talents maoy makadaug permi, wala nalay kwenta ang uban? Flower nalang sa show? Hahahahaha! Kapaet! Sigon pa sa Kinsa Siya Insider nga dili lang kini magyawyaw gusto pa niya nga tan-awon ang computation. Hala noh? Maghimo nalang siya og show nga iyaha ang judges. Mao nga kining event organizer not allowed si local handler! Kasayang sa mga talents kun maayo o potential sila! Kinsa si local handler? Daghan napud kini og napadaug nga talents apan best in attitude lang gyud! Hahahahaha!

Engrandeng natapos ang Mr. and Ms. Gaisano Grand 2017 nga gipahigayon sa puno kayo nga  Atrium sa Gaisano Grand Mall Mactan niadtong niaging Sabado, Oktubre 14, 2017. Gikan sa 20 ka finalists, diin 10 niini mga babaye ug 10 ka mga lalaki, nagmadaugon gyud sila si  Wilson Tan ug Kylah Sanchez isip Mr. and Ms. Gaisano Grand 2017. Naukyab ang mga nanan-aw ug ilabi na gyud ang mga candidates kay gi-serenade sila ni Rose Van ug ni Andre Ylanna, ang mga endorser sa usa sa mga major sponsors sa nahisgutang kalihukan. Mapasalamaton ko nga nahimong kabahin ang YUR Events and Productions sa ika-39th anniversary sa Gaisano Grand Malls diin usa sa mga highlight ang maong beauty pageant nga naghatag og kahigayonan sa mga batan-on nga mapakita ang ilang abilidad dili lang sa kaanyag, lakip na ang talento ug paghatag og importansiya sa nagkadaiyang sektor.