Bunga sa dedikasyon

Malayka Yamas

Nickname        Princess/Malayka

Name of Boutique      Malayka Yamas

Address           Cebu City

Birthdate         March 22, 1971

Place of Birth  Cebu City

Motto  Hardwork + Dreams + Dedication = SUCCESS

Matud pa sa kadaghanan, bisag asa ta dalhon sa atong pagpanimpad sa kinabuhi, ibalik gyud ta niini sa naandan natong gimbuhaton nga nikulit na og dakong kahulugan sa atong pagkatawo.

Kapin sa duha na ka dekada nga nanimpad sa fashion industry si Malayka Yamas.

Sulod sa maong panahon, daghan na siyang napamatud-an sa maong karera.

Suod sab siyang higala ni Cary Santiago nga maoy gihimo niyang idolo ug inspirasyon sa iyang mga desinyo kansang mga obra niini pang-world-class gyud.

Nagsugod ang hilig ni Malayka niini sa dihang high school pa lamang siya,diin kanunay niyang mugnaan og mga sanina ang iyang classmates.

Gikan sa pagbisti sa iyang high school classmates, hinay hinay na siyang naghimo og mga desinyo sa saput nga mao na sab ang gikakuhaan niya og panginabuhian.

Apan nahunong ang maong hilig niya sa dihang gipili niyang manimpad sa laing nasud.

Niadtong panahona, mas gipili niyang mamahimong entertainer sa Japan.

Milungtad kini og pipila ka tuig. Apan sa kadugayan, nangita gyud ang iyang lawas sa mas gipangga niining gimbuhatun, ang pag- desinyo.

Hinungdan nga miuli siya sa nasud ug sukad niadto gihatagan na niya og dakong importansya ang fashion designing.

Matud ni Malayka, bisag sa panahong tua pa siya sa Japan, nagpadayun ra gihapon siya sa pagdesinyo og mga gown nga maoy gigamit sa iyang mga kaubanang entertainers didto.

Samtang sa iyang pagpadayun dinhi sa Pilipinas, dili sab sayun ang iyang mga kasinatian una siya naila sa kadaghanan.

Apan gipatigbabaw lang niya ang iyang dakong determinasyon dungan sa makanunayung paghinumdum nga sa bisag unsang desisyun nga iyang pagabuhatun, anaa perme ang iyang pamilya nga nakasuporta kaniya.

Ubay -ubay na sab nga mga personalidad ang nabistihan ni Malayka apan ang di gyud niya malimtan mao ang higayun nga siyay mipasapot ni Ai Ai delas Alas tungod kay alang niya dili sila layu sa pagkakomedyante niini.

Diha na nakaamgo si Malayka nga hingpit na gyud siyang nahimong usa sa mga inilang designer sa dihang halos wala na siyay oras sa pagpahuway ug sa halos tanang panahon, kanunay na lamang siyang nagmugna og mga bisti.

“Kung naa koy butang nga ganahan makab-ot gawas sa pagka designer siguro mao kini ang paghatag og inspirasyon sa ubang mga designer nga nagsugod pa lang sa industriya. Gusto ko nga mogawas ang ilang natural nga talento tungod kay nahimo ko nilang inspirasyon,” pagpabuhagay pa niya.

Dugang pa ni Malayka, kanunay siyang mobalik lantaw sa mga naagian niyang kalisdanan kaniadto sa dihang wala  pa siya maabot sa iyang nahimutangan karon.

Gusto niyang ipahibalo sa tanan nga normal ra nga moagi sa kalisod tungod kay mao kini ang labing importanteng sagul sa tam-is nga timpla sa kalampusan.

Nadiskubrehan sab ni Malayka nga basta ang kakugi duyugan og pag-ampo, mag malampuson gyud ang usa ka tawo.

Dugang pahimangno niya sa aspiring designers karon sa pagpadayun lang gyud sa

pagpaninguha ug pagpaningkamot kay moabot ra ang adlaw nga moani sila og bunga nga doble pa sa ilang gitanom.

Sa katapusang bahin, dako ang pasalamat ni Malayka sa iyang mga kliyente nga maoy giisip niyang hinungdan sa pagkahimo niyang usa sa mga indemand nga designers sa Sugbo.

Todo pasalamat usab siya sa iyang mga kliyente kansang nagpadayun gihapon ang pagsalig ug pagsuporta kaniya.

Matud niya, kun dili tungod kanila, wa siya magdugay sa natad sa fashion designing.

Q and A

BNH: Sa unsang panahona ka makahimo og m aanindot nga design?

MALAYKA: I work well with pressure, so mogawas ang akong mga mugna kung pressure kaayo ko sa usa ka kliyente nga murag ma -challenge ang akong pagka-designer.

BNH: Unsay labing bag-ong recognition ang imong naangkon karon?

MALAYKA: Gi -consider nako nga lifetime recognition ang pagdaog nako isip designer sa tulo ka category sa Sinulog 2016.

• Best in festival costume for Sinulog Festival Queen worn by Aivee Tapic of Municipality of Asturias

• Best in costume for Sinulog base - Talisay City

•  Best in costume for free interpretation - Municipality of Asturias

My designs were also showcased during the APEC SUMMIT & ASEAN SUMMIT in Manila. (BANAT NEWS)