Patience Is Really A Virtue”

CEBU, Philippines - Di ikalimod nga dinhi sa Sugbo, ubay-ubay na nga mga beauty queen makers ang naila gumikan sa linahi nilang kalidad nga modala sa matag talent nga ilang gihuptan.

Pipila sa ilang mga talent ug gigunitang beauty queens padayung nagsabasaba ug mikulit og kaugalingun nilang pangalan sa pageant circuit mapa -national o international man. Sa maong natad nailhan si Danny Booc. Di na maihap ang mga kandidata diin siya ang nagsilbing  mentor nga nahimong garbo sa Sugbo sanglit kadaghanan kanila maoy morepresentar sa dakbayan ngadto sa mga nagkadaiyang kompetisyon sa kauluhan.

Pipila niini mao ang  Mutya ng Pilipinas winners nga silang Rizzini Gomez ug Jacqueline Schubert ug Miss Earth Philippines-Water Muriel Orais.

Apan labaw pa niining tanan, mas nakita ni Danny ang iyang dakong paghigugma sa fashion designing.

Matud niya dako kaayo ang iyang paghigugma niini nga maoy hinungdan nganung hingpit niyang gibiyaan ang iyang propesyon nga mao ang pagtudlo arun lamang makahatag og igong oras sa iyang pag-design sa mga nagkadaiyang sanina.

Niabot na karon og 18 ka tuig nga nahimong fashion designer si Danny.

Pagpabuhagay pa niya, nagsugod ang iyang hilig niini sa dihang grade school pa lamang siya  diin hilig na gyud siya sa pag -sketch gamit ang iyang roll pad.

Hangtud nga mitungtong na siya sa sekondarya ug didto  nagsugod na siya sa paghimo sa iyang mga sanina ug sa dihang anaa na siya sa kolehiyo , nagpamugna na kaniya og sanina ang iyang igsuong babaye. Pangangkon niya nga kaniadto, miyembro lamang sa iyang pamilya ang iyang himuan og mga sapot hangtud nga niabot na ang punto nga lakip ang iyang mga higala ug ang mga higala sa iyang higala mao nay nagpa-design og mga nagkadaiyang sanina.

Tuig 2000 sa dihang gibuksan niya ang iyang shop nga Ozar Boutique.

Giangkon usab niya nga sa pagsugod niya niining maong negosyo, agresibo kaayo siya niadto sa pagdawat og order hangtud wa na niya mabantayi nga nagkapuliki na sila sa pagbuhat niini ug halos dili na kini makaya niya ug sa iyang mga staff. Apan ang maong kasinatian nagsilbing leksyon alang kaniya sa saktong pagbahig sa ilang oras sa pagdesinyo og mga sapot arun molutaw ang linahi nga kaanindot sa iyang gimugna nga sanina.

Sama sa napaambit ni Danny nga kontribusyon sa kalibutan sa pageant industry, dili na sab maihap ang mga dagkong achievements nga iyang naangkon sa fashion industry. Gani niadtong 2009, ang gown nga iyang gimugna maoy migawas nga mananaog isip Best in Gown sa Mutya ng Pilipinas ug ang iyang gown usab ang gisul-ob sa mananaug sa Miss International 2013 nga nahitabo didto sa Malaysia.

Samtang karong bag-o lang, siya ang nagmugna sa gisul-ob ni Tourism  Undersecretary Kath de Castro atol sa Miss Universe pre-pageant activity nga gihimo dinhi sa Sugbo.

Karon, pangandoy niya nga makabisti sa garbo sa Pilipinas nga si Miss Universe 2015 Pia Alonzo Wurtzbach.

Gitug-an usab ni Danny nga sa fashion industry, tulo gyud ka tawo ang iyang gihangad ug giidolo nga naghatag kaniya og inspirasyon nga magpadayon sa pagmugna og dekalidad nga mga sanina ug gown. Sila mao si Cary Santiago, Francis Libiran ug Furne Amato.

Gipaambit sab niya nga ang iyang pamilya maoy iyang inspirasyon sa tanan.

Gusto niya nga mahatag niya ang tanang mga panginahanglanon sa iyang pamilya maong padayun ang iyang pagpursige sa fashion designing.

Mapasigarbuhon niyang gipaambit nga siya ang kasamtangang Vice-President sa Clothes for Life Foundation Incorporated ug Vice-President sab siya sa Fashion Designers Association of the Philippines.

Pagkumpisal ni Danny, tungod sa pagkamalampuson sa dagan sa iyang negosyo dinhi sa Sugbo, plano niya nga mag -abli og laing shop sa Amerika sunod tuig kansang mahimo niyang partner ang iyang igsuong babaye nga didto na nanimuyo.

Gani dili niya malilong ang iyang dakong kalipay sa iyang pagsulod puhon sa American market.

Q and A

BNH: Unsa ang dakong hagit nga imong nasugatan isip usa ka designer?

Danny: One time naa ko’y client nga debutant and during her debut nahabilin ang iyang gown sa taxi nga gi-deliver sa akong staff sa hotel kung asa mi nag make-up. But I faced the challenge, wala ko ni back-out. Nangita ko og paagi nga madayun gyud ang iyang debut and luckily naka-wear gyud siya og laing gown. And surprisingly, gihatud sa taxi driver ang debutant's gown the following day.

BNH: May panahon ba kaniadto nga nagplano ka na nga muhunong sa pagka fashion designer?

Danny: Sa una nakaingun ko nga muhunong nako, kanang usahay magkaproblema sa shop like labad ang mga staff, ma -delayed ang deliveries pero nakaraos ra man pod.

BNH: Unsa ang labing dakong leksyon nga imong nakat-unan isip usa ka designer?

Danny: As a designer, I've learned that time is gold and patience is really a virtue. (BANAT NEWS)