Storya ni Arci?

CEBU, Philippines - Nahimuot na lang nga midetalye si Arci Muñoz mahitungod sa ilang bag-ong pelikula ni Gerald Anderson nga Can We Still Be Friends? Matud pa niya nga halos pareho kini sa nahitabo sa iyang lovelife. Feeling usab niya nga gisuwat gyud ang maong istorya alang kaniya.

Na-fracture ang tiil

Na-fracture ang tuong tiil ni Luis Manzano human nasayop og tunob sa taas nga parte sa sidewalk samtang naglakaw sa kadalanan niadtong miaging adlaw. Wala mopakita og kabalaka ang TV host ug nipahibawo usab siya nga mopaubos siya og operasyon aron maalibyuhan kini dayon.

Sundon ang ginikanan

Gustong mokuha og medical course ang Kapamilya singer nga si Darren Espanto kun motungtong na siya sa kolehiyo. Matud pa niya nga gusto niya sundon ang mga lakang sa iyang ginikanan nga parehong nurse karon sa laing nasud.

Simpleng pangandoy

Simple ra ang pangandoy ni Richard Yap karon nga 50-anyos na siya niadto lang Miyerkules. Matud pa niya nga wala na siya’y pangayuon pang materyal nga mga butang ug gusto na lamang niya ang himsog nga panglawas alang kaniya ug sa iyang pamilya.

Wa gipaila-ila

Wala pa gihapon mapaila-ila ni Inah De Belen ang iyang boyfriend nga si Jake Vargas ngadto sa iyang amahan nga si John Estrada. Matud pa ni Inah nga busy pa karon ang iyang amahan ug wala pa kini oras aron makigkita kanilang duha.

Angayan ba?

Usa ang pangalan ni Kathryn Bernardo sa nalakip sa listahan sa posible nga mobida isip Darna sa remake nga pagahimoon niini. Matud pa niya nga wala siya’y nadawat nga tanyag gikan sa management sa pagkakaron. “Saka di ko alam kung tama ba ang age ko for that, marami pang puwedeng mangyari”, suma pa ni Kathryn.

Grabe ka busy

Giangkon ni Yael Yuzon nga wala pa sila’y plano sa iyang asawa nga si Karylle nga makabaton og anak. Matud pa niya nga grabe ka-busy ang ilang schedule sa ilang tagsa-tagsa ka trabaho maong dili pa sila andam nga isingit kini. Gusto usab ni Yael nga dili na sila maglisod sa pinansiyal nga aspeto kun pareho na sila ni Karylle nga motutok na sa ilang anak.

Di magkig-unay

Gibutyag ni Kris Bernal nga aduna siya’y mga katrabaho sa showbiz nga misuway gyud og diskarte kaniya. Dili nalang usab kini niya hinganlan. Apan matud pa niya nga dili na lang usab niya replyan kun mo-text kini aron mohunong na. Mas pabor karon ni Kris ang trabaho ug dili ang unayon ang iyang mga katrabaho.

Certified kapuso

Human mipirma og exclusive contract si Manilyn Reynes sa GMA-7, gipasalig niya nga magpabilin gyud siya sa Kapuso network gumikan kay mao kini naghatag og daghang proyekto kaniya. “Talagang sabi ko magta-trabaho po ako ng buong pagmamahal at buong puso kasi certified Kapuso ako”, suma pa ni Manilyn.

Naghandum sa 2NE1

Igo na lang sa paghandum ang Pambansang Krung Krung nga si Sandara Park sa kanhi grupo nga nalakipan nga mao ang 2NE1. Gahapon ang ika-8 ka tuig nga anibersaryo sa grupo sukad kini namugna. Mao nga igo lang siya mi-post og throwback video sa iyang Instagram account samtang giawit nila ang hit song nila nga “Fire”. (FREEMAN)