Naghuwat ra

CEBU, Philippines - Gibutyag ni Kapamilya star Sue Ramirez nga nagpaabot ra siya  og tawag gikan sa iyang mother network nga hatagan siya og dakong proyekto.  Matud pa niya nga wala pa’y  kompirmasyon ang gidungog nga serye nga  matud pa pagaparesan nila ni  Ronnie Alonte.

Paolo mitin-aw sa isyu

Giklaro ni Paolo Ballesteros nga dili tinuod ang nitumaw nga report nga matud pa  mahiligon siya sa pagbalon og ilimnong makahubog pinaagi sa pagsulod niini sa iyang  tumbler. Suma pa niya nga dili siya palahubog nga pagkatawo. Apan giangkon usab niya nga adunay higayon nga makatagay  siya sa mga barangay nga ilang bisitahon  sa Eat Bulaga. Matud pa niya nga motando siya kun adunay moimbitar kaniya apan dili kini niya pasubraan gumikan kay mag-live show pa sila sa TV.

Nagkita og balik

Nag-bonding ang  duha ka mga  miyembro sa DoReMi nga sila si Mikee Cojuangco ug Regine Velasquez-Alcasid. Malipayon nga gipahibalo ni Mikee sa iyang Instagram followers ang ilang panagkita sa iyang kumare.  Suma pa ni Mikee nga gimingaw na siya pag-ayo sa ilang panagtapok kaniadto.

Parte sa trabaho

Gitataw sa Kapuso aktres nga si Sunshine Dizon nga wala’y koneksyon  sa breakup nila ni  Timothy Tan ang ka-slim sa iyang lawas karong panahona. Suma pa niya nga parte kini sa iyang trabaho isip commercial endorser ug nagbantay na usab siya sa iyang timbang aron mas gwapa siya tan-awon sa kamera.

Busy ang pasko

Dili gihapon makatuo ang aktres nga si Irma Adlawan nga nalakip ang iyang pelikula  nga ‘Oro’ sa 2016 Metro Manila Film Festival. Tsika pa ni Irma nga mao kini ang unang higayon nga mahimong busy ang iyang schedule sa panahon sa Pasko. Dugang pa niya nga unang higayon kini niya nga dili siya makasaulog og Pasko kauban ang iyang pamilya.

Lisod ang proseso

Tsika pa ni Isabel Oli nga ubay-ubay nga proseso ang giagian sa iyang bana nga si John Prats sa wala pa niya kini gisugot kaniadto . Matud pa niya nakita gyud niya nga determinado kini sa pagpanguyab kaniya kaniadto mao nga na-in love siya niini.

Ipasa ang trono

Nahupas  na ang pagkamahiligon ni  Robin Padilla sa paghimo og action movies. Matud pa niya nga mas hatagan na niya og pagtagad ang rebolusyon o mga bag-ong panghitabo sa administrasyon ni Presidente Duterte. Mao nga ipasa na niya ang iyang trono ngadto sa mga aktor sa bag-ong henerasyon nga sila si Dingdong Dantes ug Coco Martin.

Naglisod sa role

Gibutyag ni Liza Soberano nga adunay higayon nga maglisod siya og buhat   sa iyang mature role sa ilang umaabot nga pelikula nila ni Enrique Gil nga My Ex and Why’s. “I’m only 18 and I haven’t experienced the things my character has experienced”, suma pa ni Liza.

Mag-uban sa show

Mahimong host ang magtiayon nga sila si Drew Arellano ug Iya Villana alang sa bag-ong game show sa Kapuso network nga People Versus the Stars. Wala pa mahisgoti kun kanus- a kini sugdan  apan gipasalig sa duha nga modalit kini og dagkong premyo sa ilang players. 

Tungod sa mga kuya

Mapasalamaton si Maine Mendoza ngadto sa gikonsiderar niya nga mga kuya sa Eat Bulaga nga sila si Jose Manalo, Wally  Bayola ug Paolo Ballesteros. Matud pa ni Maine nga nakatampo ang tulo sa pagpalambo sa  iyang showbiz career. (BANAT NEWS)