Manager ni Manolo naglinabad?

CEBU, Philippines - Gibutyag sa tagdumala sa M-Talents Events and Promotions nga si Aida Patana nga dili na gyud niya hatagan og raket ang Kapamilya star nga si Manolo Pedrosa  human matud pa naglinabad ang nagpaila nga  manager niini nga ginganlan og Jun Reyes. Matud pa ni Aida nga napungot siya og maayo kang Reyes gumikan kay gitraydor siya niini atol sa adlaw nga concert sa iyang anak nga si Stephanie sa miaging gabii.

Usa unta si Manolo sa special guest ni Stephanie apan wala kini mopatim-aw butang nga gikalagotan ni Aida.

Hinuon nagmalampuson gihapon ang maong konsiyerto gumikan kay mga lig-on ang ubang special guests nga sama nila ni Anna Fegi, Dulce, Von Saw, Medyo Maldito,  Daniel Matsunaga ug Alden Richards.

“Gusto nako patagmon ang manager ni Manolo, ni-consult nako sa akong lawyer, ako ipakita anang tawhana nga dili masayon-sayon ang taga Cebu,” matud pa ni Aida.

Matud pa nga andam na ang plane ticket ug room accommodation ni Manolo apan kalit lang  nibalibad ang manager niini gumikan kay nidemanda og full payment.

Puwerting lagota ni Aida sanglit  nibayad na sila og 50%  nga talent fee ni Manolo, ug usa sa naandan na nila nga kasabotan nga ang katunga sa bayad ihatag mismo atol sa adlaw sa show.

“Murag karon ra sila,ang katunga sa talent fee  ihatag man gyud na on the day, ako gyud na patagmon tawhana. Sa una sige sila panawag nako kay mangayo og raket unya karon ing-anaon lang ko,” saysay pa niya. Nasayran nga makadaghan na nga higayon nga nakahatag og raket si Aida kang Manolo busa nakalitan siya sa gibuhat sa manager niini.

 ‘Dugay nako sigeg hatag og raket ni Manolo, karon ra ni nahitabo, dili baya lalim among preparasyon . Naa na gyud ang iyang nawong sa poster, unya wala mismo sa adlaw sa concert, wala siya motungha,” matud pa niya.

Matud pa ni Aida nga mohimo gyud siya og legal action ug bawion gyud niya ang nahatag nila nga down payment kang Manolo.

“Upat ka buwan na mi nga naka-book niya, ing-anaon lang mi? Ayaw sayon-sayona ang taga Cebu. Ako ning gituyo  aron dili pa sila makabiktima og ubang producers, “ mensahe pa ni Aida ngadto sa manager ni Manolo.

Daniel natanggong sa CR

Samtang makapaukyab nga rebelasyon ang gisaysay ni Patana dinhi sa Banat News Hugyaw nga matud pa  duna’y kalit-kalit nga mga hitabo atol sa concert sa iyang anak nga si Stephanie sa Waterfront Hotel- Lahug niadtong Domingo sa gabii.

Bisan pa man niini, nagmalampuson ug tulin ang dagan sa maong concert ug wala nakaapekto ang mga ginagmay nga problema sama sa pagka-delay  og duha ka oras  sa flight ni Alden Richards .

Aduna pu’y higayon nga na-trap si  Daniel Matsunaga og 45 minutos sulod sa comfort room   apan wala maguba ang programa gumikan kay nisugot ra si Dulce nga patas-an ang iyang  exposure sa entablado.

“Dako gyud akong pasalamat ni Dulce kay giluwas gyud niya ang concert, bilib kaayo  niya kay wala gyud siya nagpapuno sa iyang talent fee. Pero tungod  sa iyang ka maayo, ako siya gihatagan og bonus, kay dapat  two songs ra gyud unta ang iyang kantahon,” matud pa ni Aida.Bisan pa man sa maong panghitabo , napangitaan ra gyud kini og paagi sa production team  nga gipangulohan ni Victor Cuenco.

Duet with David

Sa pikas bahin dili na gyud mabangbang ang career sa Cebuana singer nga si Stephanie gumikan kay  usa siya sa mahimong guest sa concert sa international singer nga si  David Pomeranz  dinhi sa Pilipinas sunod tuig. Maglangkob  kini sa Valentines concert  didto sa kaulohan ug sa concert ni David sa Sugbo sa   Grand Ballroom sa Waterfront  Hotel- Cebu sa Mayo sunod tuig.  Matud pa sa manager ni Stephanie nga si Aida nga nag-meeting na sila sa producer sa maong concert   nga mao ang Rock Ford Productions Inc.  niadtong Lunes sa gabii.  Maka-duet ni Stephanie si David sa entablado ug dako kini nga garbo alang sa  Cebuana singer nga makauban sa pagkanta ang usa ka international singer. “Duna’y producer nga taga Manila ang nakakita sa concert ni Stephanie, ug nakauyon man siya sa performance sa bata,” matud pa ni Aida.

Aduna pu’y umaabot nga movie project si Stephanie apan dili pa makahatag og detalye si Aida niini gumikan kay duna pa siya’y naka-scheudle nga meeting kalabot niini didto sa kaulohan sunod semana.

Mapasigarbohon hinuon nga gipahibalo ni Aida nga usa si Stephanie sa mo-perform sa  nagkadaiyang show didto sa Paris nga manukad karong October hangtod sa Nobiyembre. “Usa ka buwan kapin gyud si Stephanie didto, siyempre naa gyud ang support nila ni Cary Santiago ug Jonas Borces,” tsika pa ni Aida. (BANAT NEWS)