Maningkamot si “Bespren IFM”
CEBU, Philippines - Nagpabiling madasigon sa paghatod pa og mga programa nga malingaw ang kadaghanan. Mao kini ang nag-unang misyon sa 93.9 I-FM kinsa maoy nagpasikat sa daghang expressions sama sa “ LR-Lahi Ra”, “Salad Oh Init Pa”, “Puwede”, Ipanabi na Clouds” ug “Kanding nga Naa’y Bangs”.
Labing bag-o nga gipasikat karong sa maong station ang terminong “Bespren” nga dali ra usab nga gihangop sa ilang listeners.
Ang station manager sa I-FM nga si Raul Credo nisaysay dinhi sa Banat News Hugyaw (BNH) nga dalli ra gyud kaayo nga mopatok sa masa ang mga termino nga ilang gipanggamit gumikan kay gipaneguro nila nga dali ra kini matiman-an.
“Tungod ana, maka-form og identity ang station, unya malingaw pa gyud ang listeners ,’ suma pa ni Credo.
Samtang girespeto ni Credo ang labing ulahi nga resulta sa survey nga gihimo sa Nielsen Media Research kun diin nahimutang lang sila sa ikaunom nga puwesto ug nag-una ang Barangay RT 99.5.
“Ako gi-respect ang result , friend man pud na nako ang ilang area manager sa Barangay RT nga si AJ (Ocampo), ug happy ko para nila,” dugang pa ni Credo.
Matud pa ni Credo nga nahimutang hinuon sa ikatulong puwesto ang 93.9 IFM sa Kantar Media nga maoy partner sa Kapisanan ng mga Brodkaster ng Pilipinas. ‘Among buhaton seguro karon, amo i-verify kung asa mi hinay ug mao na ang among palig-onon og maayo,” matud pa ni Credo.
Gipasigarbo usab niya ang mga programa sa IFM gumikan kay daghan gyud nga makasabay niini ilabi na sa mga programa kung diin mohatag sila og mga tambag sa mga tawo nga duna’y suliran sama sa lovelife, pamilya ug uban pa.
Pipila sa ilang mga programa nga gihangop pag-ayo sa masa mao ang Dear Bestfriend (Dear IFM) ni DJ Rikki ug ang I-Share Bespren Roi .
“Sa kana man gud nga mga programa, daghan kaayo maka-relate kung makadungog gani sila sa stories sa ubang listeners . Almost seven years ang kanang mga programaha” matud pa ni Credo.
Nahimo usab nga swak ang tandem nila ni DJ Rob Rider ug Tita Rudee matag sayo sa buntag ug dugangan pa sa mga bulawanong mensahe nila ni DJ Ronee ug Rhoxy Gee.
Jen mihimakak
Gihimakak ni Jennylyn Mercado ang hungihong nga matud pa gipugngan siya sa GMA-7 nga makagama og pelikula uban kang Coco Martin. Suma pa ni Jennylyn nga napuno na ang iyang schedule gumikan sa mga proyekto niya sa GMA-7 busa dili na siya makasalmot sa Metro Manila Film Festival karong tuiga.
Philip gitanyagan og posisyon?
Tak-om lang si Phillip Salvador sa mga nitumaw nga report nga hatagan siya ni Presidente Rodrigo Duterte og posisyon sa gobiyerno. Kahinumdoman nga nisuporta si Philip kang Digong sa miaging piniliay.
Eksena sa Europe
Sa Europe gihimo ang pipila ka mga eksena nila ni Ritz Azul, Paulo Avelino ug Ejay Falcon alang sa serye nga A Promise of Forever sa ABS-CBN. Nagkauso na sa ABS-CBN nga himoon sa ubang nasud ang mga espesyal nga eksena sa ilang mga serye.
Kris nalingaw sa AlDub movie
Nalingaw pag-ayo si Kris Aquino sa pelikula nila ni Alden Richards ug Maine Mendoza nga Imagine You And Me. Mihirit ang iyang mga kritiko ug nikuwestiyon kun nganong giuna niya og tan-aw ang maong pelikula nga unta kadungan man niini ang pagpasalida sa Dukot nga gibidahan sa Kapamilya star nga si Enrique Gil.
Roi gihangop
Malipayon si Roi Vinzon gumikan kay mga positibong feedback ang kasagaran niya nga nadawat sa pagdala niya isip closet gay sa sexy comedy show sa GMA 7 nga A1 Ko Sa ‘Yo. Matud pa sa aktor nga nagpasabot kini nga nahatagan niya og hustisya ang iyang role. “Kapag napatawa kita, it means may ginagawa akong tama,” matud pa ni Roi.
Gipailaila sa inahan
Gipaila-ila na ni Luis Manzano ang aktres nga si Jessy Mendiola ngadto sa iyang inahan nga si Vilma Santos. Wala gihapon giklaro ni Jessy kung gisugot na ba niya si Luis.
Inspirasyon ang Ex-BF
Giangkon ni Myrtle Sarrosa nga ang ex-boyfriend niya nga si Brian Poe Llamanzares maoy gihimo niya nga inspirasyon sa dihang gisuwat niya ang awit nga “Heartbroken”. Nalakip ang maong awit sa album ni Myrtle.
Panawagan ni Diana
Ang orihinal nga Danaya nga si Diana Zubiri niawhag sa publiko nga suportahan ang bag-ong version sa Encantadia sa GMA-7. Masaligon ang aktres nga magpabilin nga hugyaw ang presentasyon sa bag-ong Encantadia.
Nagpalami sa HK
Nanuroy sila si KC Concepcion ug sa gidungog niya nga uyab nga si Aly Borromeo didto sa high-end nga bar sa Hong Kong nga Ozone Sky Bar and Lounge. Suma pa ni KC nga usa sa mga paborito niya nga lugar ang HK busa nalipay kaayo siya nga nakauban niya si Aly sa pagbakasyon sa maong dapit. (BANAT NEWS)
- Latest