Kris nakadayeg ni Alden
CEBU, Philippines – Gipadayag ni Kris Aquino nga malipayon siya sa kalampusan nga naangkon sa career ni Alden Richards. Suma pa sa TV host nga nakakita gyud siya kung unsa ka buotan ang aktor sa dihang nibisita siya sa studio sa Eat Bulaga niadtong 2013. Giangkon sab niya nga ka-upat na siya ka higayon nga nakakita sa Kalyeserye sa Eat Bulaga, apan love gyud niya pa si Vice Ganda. Gibutyag niya nga nahimamat na niya si Yaya Dub o Maine Mendoza kaniadto pang gi-dubsmash siya niini ug wala pa nisikat sa telebisyon.
Orihinal nga linihokan
Gipaneguro ni Coco Martin orihinal gyud ang iyang mga lihok sa nagkadaiyang action scenes sa serye niya nga “Ang Probinsyano.” Naglikay siya nga musundog sa lihok sa orihinal nga bida niini nga si anhing Fernando Poe, Jr. aron duna’y bag-o nga makita sa TV viewers.
Bella gihangop
Gawas kang Dennis Trillo, naputos usab sa mga pagdayeg gikan sa mga sakop sa Iglesia ni Cristo ang aktres nga si Bela Padilla gumikan sa maayong pagkadala niini sa pelikulang Felix Manalo. Siya maoy midala isip Ka Honorata nga kapikas sa founder sa INC .
Sofia mopahuway sa social media
Temporaryong mopahuway si Sofia Andres sa social media apan nagdumili siya pagsulti sa rason niini. “Thank you for everything, the love and support. I may not be posting but I will always check on you. I promise that I’ll be more active when I’m whole again,” suma pa sa aktres.
Nag-ilhanay pa
Aduna’y lalaki nga midiskarte karon kang Alex Gonzaga apan padayon pa kini nga giila-ila og tarong sa aktres aron dili siya magmahay sa makab-ot niya nga hukom. “It just so happened that I met a guy but hindi naman kami talaga. It’s just getting to know each other. We’ll see,” tsika pa ni Alex kinsa bag-ohay lang mi-renew sa iyang kontrata sa ABS-CBN.
Karon pa niangkon
Giangkon ni Kean Cipriano nga uyab sila sa Kapuso star nga si Chynna Ortaleza. Iyaha kining gibutyag atol sa interview niya sa programang Tonight With Boy Abunda. Apan duna’y ubang mga tawo ang wala na makugang niini gumikan kay hagbay ra nga nasakpan ang ilang taud-taud na nga relasyon.
Gabby pasok sa serye
Malakip si Gabby Concepcion sa umaabot nga serye ni Carla Abellana sa GMA-7. Giplantsa na ang maong proyekto ug malipayon si Carla gumikan kay makauban niya ang dili basta-basta nga aktor.
Miarang-arang ang tingog
Gibutyag ni Regine Velasquez nga miarang-arang na og balik ang iyang tingog. Kahinumduman nga naapektohan ang tutonlan ni Regine kaniadto gumikan sa acid reflux. “Slowly it‘s getting back to normal,” tsika pa sa singer ngadto sa pep.ph.
Klaro sa pattern
Wala modirekta og angkon si Paolo Contis sa relasyon nila ni LJ Reyes apan nipadayag kini nga malipayon silang duha sa kasamtangan nila nga istado. Ang duha kanunay nga masigpatan nga mag-uban sa pagpanuroy.
Mangunay og maneho
Wala’y plano si Nadine Lustre nga mokuha og personal driver gumikan kay kontento ra siya sa iyang pagpangunay og maneho sa iyang sakyanan. Naandan na kini sa aktres busa daghan ang nakadayeg kaniya.
- Latest