Hugyawnatic

Dear Banat News Hugyaw,

Hello sa tanang tigbasa sa Banat News  ilabi na dinhi sa Love Story. Dugay na gyud ko tigbasa ani ug karon lang ko naaghat nga mopadala sa istorya sa akong lovelife kaniadto.

Taud-taud na ko nga wala'y uyab ug happy na kay ko sa akong pagka-single.  NIndot man diay kung single, kay wala'y daghang hunahunaon ug makalaag ka nga  wala'y magpugong kanimo.

Ako diay si Renzy , 28 anyos  ug nagpuyo ko  sa Kinasang-an Pardo ug ako lang i-share ang istorya sa katapusan nako nga nauyab nga  ginganlan og Kevin , 27 anyos nga taga Mindanao apan dinhi siya sa Cebu nag-work.  Nagbuwag na mi , ug naka-move on nako niya busa confident ko nga akong i- share ang among istorya.

Pareho ming duha ni Kevin, mga bisexual apan dili gyud mi halata. Kung mag-uban mi kay mura gyud mi og amigo gumikan kay lalaki gyud kaayo ang among pamarog.

Nagkaila mi ni Kevin tungod lang sa usa ka social networking site kung diin mga bisexual ang nangapil. Nagka-chat mi ani niya ug nagkasinabot nga mag-meet.

Managhigala ra gyud ang tinagdan namo sa usag-usa, kanunay mi nga manuroy nga kami rang duha. Wala ko magdahom nga  nga na-develop mi sa usag-usa,  kay sa tinuod lang nga mura na gyud mi og uyab, kung mag-overnight mi sa mga resort, magtupad mi og katulog.

Nakahukom ming duha nga himuon pa namo og tam-is ang nasugdan namo nga relasyon ug opisyal na gyud mi nga nagkauyab niadtong December 1, 2013.

Didto mi nagkauyab sa Moalboal , kay nagpadagat mi niadtong higayona aron ma-relax. Buotan gyud kaayo si Kevin, caring ug understanding kaayo siya nga pagkatawo ug mao na'y rason nga  dali ra kay ko mingawon niya kung dunay mga higayon nga dili magkita.

Pag-abot sa Valentine's Day (2014),  didto gyud mi nag-date sa Bantayan  kay nakahisgot man ko niya nga ganahan kay ko sa maong lugar.

Apan sa pagka- June 2014, kalit lang nagtakilid ang among relasyon. Among gibuhat ang tanan aron lang gyud dili magkabulag apan wala gyud kini masalbar.

Nagkalalis ming duha tungod sa akong pagka-seloso, sa tinuod lang, magselos gyud ko kung kita ko duna siya'y close nga laing lalaki.

Permi nako siya kasab-an  kay lage ko dli ko ganahan nga makuha siya sa ubang tawo. Modepensa siya nga dili daw ko angayan nga magselos kay normal lang nga dunay suod nga mga higala ang usa ka tawo.

Mao gyud na permi namo nga lalisan ug kanunay ko ingnon ni Kevin nga kusog daw ko  mangaway niya.

Tungod kay paranoid man ko sa among relasyon, usahay makabuhi ko og bad words sa higayon nga mogawas ang akong pagka-seloso.

Niabot ang panahon nga wala na kaagwanta si Kevin ug niana  nga magbuwag na lang mi gumikan kay dili na siya kaaguwanta sa akong batasan. Gisamokan na siya sa akong pagka-seloso , bisan sakit alang kaniya, mas maayo nga magbuwag na lang mi aron magmalinawon na ang iyang kinabuhi.

Wala na niya maantos  ang among sitwasyon nga magsige og lalis, ug nakaingon siya nga dili na siya happy sa among relasyon.

Nangayo ko og sorry, ug nagpakiluoy ko kaniya aron dili mi magkabuwag , niluhod pa gani ko sa iyang atubangan aron lang maluwas pa ang among relasyon.

Apan nilakaw siya ug giingnan ko niya nga papason na nako ang iyang cell number, ug dili na daw ko magpakita kaniya kay final na ang iyang hukom nga magbuwag mi.

Igo na lang ko sa paghilak, niabot pa og unom ka buwan human ko naka-move on. Grabe gyud kasakit , taas nga panahon nga magsige ko og huna-huna kaniya apan kutob na lang ko sa paghilak. Sala gyud nako nganong nagkabuwag mi, nagmahay ko sa akong gibuhat apan ulahi na ang tanan. Mo-request ko sa lyrics sa Kiss Me Goodbye by Petula Clark. Daghang salamat Banat News.

Hi Renzy! Thank you so much sa imong LOVE STORY! Paabuta ugma puhon ang imong request.

Dear HUGYAWnatics, aduna ba kamo'y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story

C/o Banat News

V. Gullas St. corner D. Jakosalem St.

Barangay Sto. Nino

6000 Cebu City, Philippines