Human sa preliminary MJ misamot ang tsansa

CEBU, Philippines - Pasok gyud sa listahan sa beauty pageant fanatics sa tibuok kalibutan si Miss Philippines Mary Jean Lastimosa, human sa preliminary competition didto sa Doral, Florida diin nagtigi ang mga kandidata sa Miss Universe 2014 pinaagi sa evening gown ug swimsuit segments.

Gawas kang Philippines nauyonan usab og maayo ang performance ni Miss Colombia, apan may nanagna nga higpit niyang makatigi sa korona ang pambato sa atong nasud. Gipakpakan sab og maayo si Miss Spain.

May mga ni-abiba sab sa gipakitang labok nila ni Miss Jamaica ug Miss Serbia.

Ang uban pang dili malimtan nga performance kagahapon suma pa sa mga pageant fanatics mao ang pambato nga naggikan sa Austria, Brazil, Costa Rica, Argentina, Venezuela, Ukraine, India, Puerto Rico, Dominican Republic ug Peru.

Nasayran nga ang white gown nga girampa ni Lastimosa gidisenyo sa Colombian nga si Alfredo Barraza. Sa wala pa ang preliminary competition kagahapon, may mga wala nakauyon sa maong gown. Apan dihang girampa na kini niya kagahapon daghan na ang nipakpak gumikan kay maayo kaayo niya kining pagkadala.

John Lloyd mi-renew sa ABS-CBN

Mi-renew si John Lloyd Cruz sa iyang kontrata sa ABS-CBN kagahapon busa hingpit na gyud nga natuldokan ang tsismis nga matud pa mobalhin siya og laing network.

Gipirmahan sa aktor ang “three-year contract” ug gisaksihan kini nila ni  Star Magic executive Mariole Alberto, Star Cinema managing director Malou Santos, ABS-CBN channel head Cory Vidanes, ug  ABS-CBN president Charo Santos-Concio.

Padayon pa’ng gisalida

Nikabat na matud pa og P440 million ang kita sa pelikulang Amazing Praybeyt Benjamin  nga gibituonan ni Vice Ganda ug padayon pa gihapon nga makita sa mga sinehan bisan pa man og nahuman na ang Metro Manila Film Festiva (MMFF)l.

Ang maong kasayuran, naggikan sa direktor niini nga si Wenn Deramas.

Gawas kang Vice, makita usab niining maong pelikula sila si Richard Yap ug Bimby, ingon man si Alex Gonzaga.

Gumikan niini, kumpirmado na nga ang Praybeyt Benjamin 2 gayud ang top grossing film sa MMFF 2014, hinungdan nga nagpasalamat og maayo si Vice ngadto sa publiko nga nibubo sa ilang suporta ngadto sa iyang pelikula.

Samtang gikumpirma ni Vice nga ang pelikula nila ni Coco Martin ang una niyang movie nga himuon karong tuiga ug sama sa gikaingon na sa award-winning actor karong Oktubre ang target playdate niini.

Kahinumduman nga konsepto matud pa kini sa award-winning actor ug iyang gipaambitan kang Vice nga suod niyang higala. Nagkasabot ang duruha ug ilang gidala ngadto sa Star Cinema nga nakauyon usab sa konsepto ni Coco.

Ang ikaduhang pelikula ni Vice karong tuiga mao na ang para sa MMFF diin si Daniel Padilla ang iyang makauban.

Magsinagpaay og balik

Subling magtigi atubangan sa kamera sila si Eula Valdez ug Jean Garcia  pinaagi sa seryeng The Half Sisters. Nasayran nga gidugang si Eula sa nahisgutang serye. Unang nagkauban ang duha niadto isip Amor Powers ug Claudia Buenavista sa seryeng Pangako Sa ‘Yo sa ABS-CBN niadtong 2002.

Marlene talawan

Gidedma lang ni  Marlene Aguilar ang mga hagit ni Mystica nga andam kini mosukol kaniya pinaagi sa bugno. Giingnan na hinuon si Marlene sa iyang kritiko nga talawan.

Malantawan sa ubang nasud

Gikatahong gikontrata sulod sa usa ka tuig sa  usa ka dakong kompanya  ang indie film nga Island Dreams nga gibidahan ni Louise delos Reyes. Nasayran nga moabot ngadto sa    7 million subscribers worldwide ang nahisgutang kompanya busa malantawan kini sa Turkey, North Cyprus, Turkish Republic, Germany, Holland, Belgium, France, ug pipila ka mga dapit sa  Amerika.

Simple lang

Tsika pa ni  Angelica Panganiban nga kung pananglitan mo-propose na gani ang iyang boyfriend nga si John Lloyd Cruz  , gusto niya nga himoon kini nga  pribado ug gusto niya nga ang tagsa-tagsa lang nila ka mga kaliwat ang makasaksi niini.

Ipasalida sa Spain

Ang indie film ni Angel Aquino nga Ang Huling Cha-Cha gikatahong nalakip sa  2015 Zinegoak Bilbao International GLT Film Festival nga ipahigayon sa  Spain sa umaabot nga mga adlaw. Kahinumduman nga ubay-ubay na ka mga pasidungog ang nadawat sa maong indie film.

Nora gihulga

Nakadawat og  text messages ang aktres nga si Nora Aunor kung diin naghatag kini og hulga sa iyang seguridad.  Giingong duna kini kalabotan sa kasong perjury  nga iyang gipasaka sa iyang ig-agaw nga si Saturnino nga gipasanginlan niya nga nibaligya sa iyang 10 ektarya nga yuta  didto sa Iriga City.

Topacio mibiya

Mi-withdraw si  Atty. Ferdinand Topacio isip  legal counsel ni Claudine Barretto sa mga  kasong kriminal nga gipasaka batok sa  estranged husband niini nga si  Raymart Santiago ug sa kanhi katabang niini.Wala hinoun modetalye si Topacio sa tukmang rason sa iyang pagbiya sa maong kaso.

Mahalon nga gown

Ang mahalon nga wedding gown maoy regalo ni John Prats ngadto sa iyang hinigugma nga si Isabel Oli. Naghinam-hinam na ang duha sa umaabot nila nga kasal karong Mayo. Ang sikat nga designer nga si Vera Wang maoy mogama sa wedding gown ni Isabel.

Pelikula ni Vice kinahawran “of all time”

Duha ka mga pelikula ni Vice Ganda ang nag-una sa listahan sa Top 10 Highest-Grossing Filipino Movies of All Time, base sa artikulo nga gimantala sa www.starmometer sa nilabay nga adlaw.

Suma total, upat ka mga pelikula ni Vice ang nalakip sa maong listahan.

Sa maong listahan, usa lamang ang pelikula nga dili ginama sa Star Cinema ug Viva Films. Kini mao ang My Little Bossings nga iya sa Octo Arts Films ug APT Entertainment.

Ang listahan dia ra:

1. Amazing Praybeyt Benjamin/ Star Cinema, Viva Films/ 2014/ P440-M

2. Girl, Boy, Bakla, Tomboy/ Star Cinema, Viva Films/ 2013/ P436-M

3. Starting Over Again/ Star Cinema/ 2014/ P410-M

4. My Little Bossings/ OctoArts Films, APT Entertainment/ 2013 P400-M

5. Sisterakas/ Star Cinema, Viva Films/ 2012/ P393-M

6. It Takes A Man And A Woman/ Star Cinema, Viva Films/ 2013/ P375-M

7. The Unkabogable Praybeyt Benjamin/ Star Cinema, Viva Films/ 2011/ P331-M

8. Bride for Rent/ Star Cinema/ 2014/ P326-M

9. No Other Woman/ Star Cinema, Viva Films/ 2011/ P278-M

10. The Mistress/ Star Cinema/ 2012/ P262.8-M