Solenn intresado sa ABS-CBN?

CEBU, Philippines - Gihugon-hugon  nga intresado  matud pa si Solenn Heussaff nga mobalhin sa ABS-CBN . Giingong nagpaabot na lang si Solenn nga mahuman ang iyang kontrata sa GMA-7.

Gipanag-iya sa Star Records

Wala na mananghid si Kathryn Bernardo ngadto kang Sharon Cuneta sa pag-revive niini sa awit nga Mr. DJ. Giingong property na sa Star Records ang maong kanta nga ginama ni Rey Valera.

Pagbasa maoy gikalingawan

Ang pagbasa og mga inspirational book maoy gikalingawan karon ni Sen. Bong Revilla sulod sa PNP Custodial Center sa Camp Crame. Daghan matud pa siya og nakat-onan niini aron tulin na lang niya nga atubangon ang mga pagsuway sa kinabuhi.

Ai-Ai motabang gihapon

Gipadayag ni Ai Ai delas Alas nga makatabang gihapon siya sa isigktawo sa lain nga pamaagi bisan paman nga dili siya mosulod sa politika. Kahinumduman nga nakahukom na ang komedyanteng aktres nga dili modayon sa iyang plano nga mosulod sa politika karong 2016.

Kathryn nag-sorry sa Dongyan

Nangayo og pasaylo si Kathryn Bernardo ngadto nila ni Marian Rivera ug Dingdong Dantes gumikan kay dili siya katambong sa kasal niini karong December 30. Nasayran nga na-conflict kini sa show niya sa abroad.

Bantay sa anak

Moistar og pipila ka semana si Christopher de Leon sa Amerika aron personal nga mabantayan ang anak nila ni Sandy Andolong nga nasakit.  Arang-arang na ang kondisyon karon sa ilang anak.

Alden gikagubtan sa Vietnam

Mitambong ang Kapuso star nga si Alden Richards sa pagbukas sa Hanoi International Film Festival sa miaging gabii sa  Hanoi, Vietnam ug gikagubtan ang aktor sa maong dapit. Siya ang representante sa pelikulang ‘Kinabukasan’. Kauban ni Alden sa maong pelikula ang superstar nga si Nora Aunor. Nominado ang ‘Kinabukasan’ sa short film category.

Paolo gihulga

Wala na mahimuot si Paolo Ballesteros sa iyang “bashers” gumikan kay naabot na sa punto nga gihulga ang iyang kinabuhi.  Ang nakapalagot og samot kaniya gumikan kay giapil og atake ang mga suod niya nga higala.

Nagtinabangay sa gasto

Giangkon nila ni Bianca Gonzalez ug PBA player nga si JC Intal nga nagtibangay gyud silang duha sa mga gastohan sa umaabot nila na kasal karong December 10. Suma pa sa duha nga ilaha gyud kini nga gitigoman.

Lig-ong relasyon

Gipadayag ni John Lloyd Cruz nga mature gyud og huna-huna si Angelica Panganiban ug mao kini ang rason kung nganong nagpabiling lig-on ang ilang relasyon. Bilib kaayo si Lloydie sa iyang uyab gumikan kay dili kini basta-basta madala og mga intriga.

Jamie lig-on gyud!

Nagkadako ang posibilidad nga malangkat gayud sa Sugbuanong si Jamie Herrell ang Miss Earth crown karong tuiga. Human siya nidaog isip Best in Swimsuit ug Darling of the Press sa mga pasiunang pre-pageant activities, padayon ang pag-arangkada sa pamabato sa Pilipinas sa nahisgutang indigay sa kaanyag.

Niadtong nilabay nga gabii, si Herrell, maoy nakalangkat sa Silver award sa Best in National Costume competition. Suma pa sa banggiitang make-up artist ug beauty queen maker Jonas Borces, ang Sugbuanong si Malayka Yamas ang nagmugna sa national costume ni Herrell. Miabag usab ang mga Sugbuanong sila si Mark Tenchavez ug Nestor Castillano sa SHANDAR alang sa sapatos ug accessories nga gigamit ni Herrell niadtong nilabay nga gabii.

 Ang coronation night sa maong indigay sa kaanyag ipahigayon karong Sabado sa gabii, November 29 sa UP Diliman Theater.

Brad ug Angelina nag-away?

Miulbo ang tsika nga matud pa naglalis og maayo sila si Angelina Jolie ug  Brad Pitt samtang naa sila sa usa ka  hotel sa Sydney, Australia.

Giingong adunay mga tsismosa nga nakakita sa panagbikil sa duha ug miabot matud pa sa punto nga mihata og hapak si Brad sa iyang kamot ngadto kang Angelina.

Matud pa nga kusog ang ilang siningkahay apan nagpabiling tak-om ang duha sa maong isyu. (BANAT NEWS)