Excited maka-apo

CEBU, Philippines – Kung si Vilma Santos ang pasultihon, naghinam-hinam na siya nga makaapo nila ni Luis Manzano ug Angel Locsin busa uyon kini nga magpakasal na ang duha. Una na nga gipadayag ni Luis nga si Angel na gyud ang babaye nga makauban niya hangtud sa kahangturan.

LT sa Kathniel movie

Malakip si Lorna Tolentino sa umaabot nga pelikula nila ni Daniel Padilla ug Kathryn Bernardo. Dakong garbo alang kang LT nga makauban ang usa sa mga sikat nga magka-loveteam karon sa showbiz industry.

Ikaduhang bridal shower

Sila si Lovi Poe, Soleen Heussaff, ug Alessandra de Rossi maoy  nipasiugda sa ikaduhang bridal shower sa ilang higala nga si Heart Evangelista niadtong Domingo. Suma pa sa tulo nga maayong higala si Heart busa todo ang suporta nila niini.

Bag-ong mugna

Adunay umaabot nga Christmas musical special si Regine Velasquez sa GMA-7. Pipila sa iyang special guests naglangkob nila ni Ariel Rivera ug Julie Anne San Jose.

Rufa Mae namaligya og bag

Gipamaligya ni Rufa Mae Quinto ang mga mahalon niya nga bag. Nagbaha ang mga bag sa aktres busa dili na niya maato ang pagamit niini.

Dakong garbo

Adunay mga pasiunang negosasyon karon nga matud pa pakantahon si Rico Blanco atol sa pagbisita ni Pope Francis dinhi sa Pilipinas sunod tuig. Gipadayag ni Rico nga wala pa’y final nga detalye niini basta dakong garbo alang kaniya nga maimbitar sa maong dakong kalihukan.

Maayo moluto

Maayo diay muhimo og leche flan ang Kapamilya star nga si Kathryn Bernardo.  Si Daniel Padilla maoy kanunay niya nga lutoan niini .

Gibasted

Giingong wala sugta ni Alex Gonzaga si Arjo Atayde. Gipabilin hinuon sa duha ang ilang panaghigalaay. Ang duha nagkasuod human sila nagpares sa serye niadto sa ABS-CBN nga Pure Love.

Matteo bida sa serye

Aduna’y umaabot nga comedy-fantasy series si Matteo Guidecilli sa ABS-CBN. Karong  December 3 magsugod ang taping niini ug wala pa gidetalye sa aktor kung kinsa ang mga makauban niya sa maong proyekto.

Julia ug Iñigo sa MMK

Sila si Julia Barretto ug Iñigo Pascual maoy mga bida sa Maalaala Mo Kaya karong Sabado, Nobiyembre 29.  Nagpanikad na ang duha sa mahimong resulta niini. Modala ang duha isip suod nga managhigala hangtud nga duna’y mitubo nga feelings nila sa usa’g-usa

Jodi makalaag na gyud

Makabakasyon na gyud og taman si Jodi Sta. Maria ug namili na siya og nasud nga mahimo niya nga laagan. Kahinumduman nga taud-taud na nga nauswag ang mga laag ni Jodi gumikan sa ka-busy niya niadto sa taping sa seryeng Be Careful With My Heart. Ang maong serye matapos na karong Biyernes.

Kristoffer mihilak

Usa ka surpresang birthday party ang gidalit sa GMA Artist Center ngadto lang Kristoffer Martin sa miaging adlaw. Nakahilak ang aktor niini ug wala niya damha ang presensya sa iyang mga higala ug usa na niini ang iyang ex-girlfriend nga si Joyce Ching .

Luis padayong gikumbinser

Ubay-ubay na ka mga grupo sa Batangas ang nangulitawo karon kang Luis Manzano aron maoy padaganon nila og gobernador sa ilang dapit karong 2016. Wala pa gyud kahukom ang TV host kalabot sa maong butang.

Jennica mabdos

Gianunsyo ni Jennica Garcia nga lima na siya ka semana nga nagsabak busa aduna na’y umaabot  nga apo ang iyang inahan nga si Jean Garcia. Gipakita sa bana ni Jennica nga si Alwyn Uytingco ang resulta sa ultrasound.

Bunot molugwa sa GGV

Mikisaw na gyud og samot sa nagkalain-laing dapit sa kalibutan ang ‘Michael Bulton’ sa Cebu nga si Roland “Bunot” Abante, 36 anyos  nga taga Santander, Cebu.

Nag-viral ang video sa version niya sa “To Love Somebody” gumikan kay kuha kaayo niya ang tingog sa original singer niini.

Ang manager ni Bunot nga si John Tugot misaysay dinhi sa Banat News Hugyaw nga dunay umaabot nga TV guesting  ang iyang alaga sa Gandang Gabi Vice sa ABS-CBN ug nagpaabot na lang siya sa tawag alang sa final nga petsa sa taping niini.

Nadiskubrehan ni John si Bunot sa dihang nakit-an niya kini nga nikanta sa usa ka banda.

Gipahibalo usab niya nga interesado ang Ellen DeGeneres show nga mopa-guest ni Bunot sa maong show.

Nasayran nga nagbaha karon ang national nga mga TV network nga ni-interview kang Bunot gumikan sa talagsaon niya nga tingog.

Matud pa niya nga dako kaayo og natabang ang mga social networking site kang Bunot gumikan kay mao kini ang nahimong instrumento nga nailado kini og samot ang nahisgutan.

Power Trio Shines

Makapalimbawot sa balahibo ug seguradong mahugyaw ang maminaw sa makabibihag nila nga tingog. Ingon niini ang kalidad sa bag-ong grupo sa mang-aawit nga “Power Trio” nga gilangkoban nila ni Masumay “Sam” Booc (22-anyos), Stephanie “Steph” Mananquil (19- anyos) ug May Ann “May” Mananquil (17- anyos).

Ang tigpamaba sa ilang grupo nga si Sam nisaysay dinhi sa Banat News Hugyaw (BNH) nga naporma ang ilang grupo sa hinapos nga bahin sa miaging tuig ug pop songs ang kasagaran nila nga tirada.

Mga pagdayeg ang kasagaran nga madawat sa Power Trio  sa matag human nila og kanta sa entablado ug gipatuman nila ang hingpit nga disiplina sa tagsa-tagsa nila ka mga kaugalingon, sama sa paghatag og saktong pahuway sa lawas aron dili maapektohan ang ilang mga tingog.

Usa sa ilang estilo mao ang pagpaminaw og tarong sa musika aron mahatagan nila kini og saktong emosyon sa higayon nga mo-perform atubangan sa daghang tawo.

“To all the aspiring singers/performers like us, ayaw mo’g give up sa inyong gusto.  Whatever you love to do, e pursue jud! Do everything in your power na ma-share imong talent sa world, always be confident kay in one way or another maabot ra jud ang break sa tawo and you have to make sure prepared ka when that comes,”  suma pa ni Sam.

Nahimo na nga kabahin sa ilang kinabuhi ang musika gumikan kay usa kini sa makapawala sa ilang kalaay ug sa susamang higayon, nakahatag usab sila og kalingawan sa mga tawo.

Nasayran nga importante kaayo ang musika sa kinabuhi sa tawo gumikan kay dunay mga mensahe niini ang mahimong kapanaminan ug magsilbing inspirasyon sa tagsa-tagsa nato ka kinabuhi.

Ang Power Trio gidumala sa M-Talents Events & Promotions nga gipanag-iya sa Sugbuanong negosyante nga si Aida Patana.

Suma pa ni Aida nga anak niya sila si Stephanie ug May Ann ug nadiskubrehan niya ang kanindot sa tingog ni Sam  busa nakahuna-huna siya nga magporma og grupo.

Niadtong Disyembre sa miaging tuig, gipalugwa niya sa Walang Tulugan ni Kuya Germs sa GMA-7 ang Power Trio ug daghan ang naukay sa ilang performance busa gipabalik sila og guest sa maong programa.

Dugang pa ni Aida nga malakip sa pipila ka mga pelikula ang iyang mga “alaga” ug usa kini sa angayan atngan.

“Dunay uban kanila ang nahuman na og shooting didto sa Manila, kining si Steph, maapil siya sa Gangster Lolo ,  ug duna pa sila’y ubang movie projects,” dugang pa niya.

Matud pa niya nga dili lang kutob sa pagkanta ang mabuhat sa Power Trio, aduna pud sila’y talent sa pag-arte.

“Gitawag na sila og Power Trio, kay grabe gyud ka-power ang ilang mga tingog. Kung ang mga tawo makadungog sa ilang tingog, seguro gyud nga mopakpak,” nagkanayon si Aida.

Tumong lang gyud ni Aida nga makatabang sa mga tawo nga dunay mga talento ug iyang gipasigarbo nga dugong Sugbuanon ang Power Trio.

Alang sa dugang kasayuran kabahin sa Power Trio pangitaa sila sa Facebook pinaagi sa: [email protected]