Hugyawnatic

Dear Banat Hugyaw

Hi diay sa tanang readers sa Banat News, ako diay si Paulo, 22 anyos ug taga Guadalupe, Cebu City. Ako diay i-share ang kaagi nako sa wala pa mi nagkauyab sa akong girlfriend karon nga si Marian.

Taga Guadalupe gihapon si Marian ug makaingon ko nga siya na gyud ang babaye nga gusto nako pakaslan puhon.

Susama ming duha, puros mi nga nagtrabaho apan amo gyud nga seguradoon nga naa gyud mi oras sa usa’g-usa.

Nagsugod ang among istorya sa gugma sa dihang gipaila-ila si Marian sa among common friends.

Pag-una pa lang ko kita niya, murag duna'y gamay nga spark.  Hinuon wala kaayo ko miseryoso adtong panahona kay para nako, murag arte man siya.

Wala ko gadahom nga pag-usang adlaw, nilaag na siya dapit sa amo, nakakita ko niya pero wala ko motagad uy, basin pa lang dedmahon ko.

Apan nakugang na lang ko kay gitawag ko niya ug naka-remember siya sa akong pangalan. Niapil ko sa ilang tapok. Maayo gani kay friends ra pud nako ang uban niya nga barkada. Hangtud nagkasuod na mi og maayo.

Pero dili ko ganahan mag-assume, wala sad ko magpakita nga interested ko niya kay basin masakitan ra unya ko.

Nakadungog ko’g mga istorya sa uban namo nga friends nga matud pa na-develop na daw si Marian nako. Pero wala ko mutuo sa ilang sulti kay nagduda ko nga mugna ra gyud kini ilabi na nga gitupo-tupo ming duha.

Dili kay ko ganahan anang tupo-tupo gud kay murag mapugos ra ang tawo. Nakabantay ko nga magsige na og laag si Marian dapit sa amo, unya pangitaon gyud ko niya.

Nakabantay ko siya ang unang mo-text nako ug mo-reply ra sad ko og simple nga mensahe. Wala ko'y plano nga magpa-cute sa text. Pero duna'y higayon nga  "honey" bitaw ang akong gigamit sa pagtawag kaniya.

Wala ko magdahom nga nikagat siya," honey" na pud ang itawag niya nako. Kataw-anan kaayo kay bisan dili pa mi uyab atu kay honey gyud ang maong tawganay.

Wala gyud ko modiskarte kaniya, kay nagtuo man ko nga basin friendly ra gyud siya apan naabot ang panahon nga niprangka siya nga kinahanglan nga magklarohay na gyud mi sa among status.

Susama gyud sa mag-uyab among teksanay. Laktod pagka-istorya, updated mi sa usa’g-usa. Hahaha.

Sa iyang pagprangka, niana pud ko nga nag-agad ra ko niya ug nisulti ko sa tinuod nako nga feelings nga nakagusto ko niya.

Nauwaw ko gamay kay ang babaye pa'y nihimo og pamaagi aron mosulti ko sa akong feelings. Ako siya gisultihan nga dugay nako nga nahigugma niya, ug niangkon pud siya nga nahigugma pud siya nako.

Niana dayon ko if okay ra ba niya nga magkauyab mi, total gusto bitaw namo ang usa’g-usa,  Mapasalamaton ko kay gisugot dayon ko niya.

Makaingon gyud ko nga torpe ko nga pagkalalaki, kung wala pa si Marian niprangka nako, dili unta mi magkauyab. Duha ka tuig kapin na ang among relasyon karon. Mo-request diay ko sa lyrics Terrified by Katharine McPhee.

Hi Paulo! Daghang salamat sa imong LOVE STORY! Paabuta ugma puhon ang lyrics nga imong request.

HUGYAWnatics, aduna ba kamoy LOVE STORY nga buot ninyong paambitan? Suwata kana ug ipadala pinaagi sa [email protected] o Facebook: [email protected]