Panghadlok Na!

CEBU, Philippines - Nagkaduol na ang October 31. Ang uban kanato gikatakda na nga motambong og mga Halloween party , puwes dili na kinahanglan mogasto og dako alang sa imong make-up ug costume. Ang ilado nga designer ug make-up artist sa Sugbo nga si Lemuel Rosos nipadayag nga makahadlok na lantawon ang imong panagway sa pagamit og nagkalain-laing materials ug iyaha kining gipaambit alang sa mga suki nga readers sa Banat News IN.

 Tips sa pagbutang og make-up:

• Pagamit og foundation , mao kini ang basic nga gamit ilabi na sa mga tawo nga gustong mosundog sa hitsura sa white lady.

• Kung gusto nga dunay dugo ang imong panagway, gamita ang karaan nimo nga lipstick. Ayaw gamita ang bag-ong lipstick aron dili kini masayang.

• Kung gusto ka makahadlok og samot ang hitsura, mahimo ka nga mogamit og itom o ba kaha pula nga contact lens.

Tips sa pagpangita og costume:

• Karaan nga sinina ang gamita tungod kay imoha ra man kini nga hugaw-hugawan.

• Kung duna ka'y karaan nga mga panapton, gamita kini ug itaud sa kilid-kilid nga bahin sa imong costume.

• Pag-research og mga hulagway sa tawo nga makahadlok, aron  dali ra ka nga makahuna-huna sa konsepto sa imong dagway.

Pipila kanato ang motikang sa nagkadaiyang horror booth nga puwerting mahala.

 Apan duna pu'y magbarkada nga mas pilion nga mo-organize og Halloween party aron taas ang oras sa paglingaw-lingaw.

  Ang event coordinator nga si Monica Louisse Socorro Gabutan sa House of Ella Production nibutyag dinhi sa Banat News IN sa mga pamaagi sa pagpasiugda og Halloween party.

"Naka-handle na mi og ingon ana nga party sa miaging tuig. Dili man kaayo gasto basta resourceful lang gyud ka. Pananglitan kung magbarkada mo, unya inato lang nga party ang imong gusto, seguro mga P2,500, igo na kaayo na para ninyo," suma pa ni Monica.

Tips sa pag-organize og Halloween party

• Andamon ang tugkaran,o ba kaha kuwarto nga masigo mo nga magbarkada.

• Kinahanglan kuhaon daan ang listahan sa manambong aron mahibaw-an dayon  ang gidak-on sa lugar nga maoy venue sa inyong party.

• Paghuna-huna dayon og tema. Gamay ra ang gasto kung ang tema ninyo daw sa sementeryo. Mga karaan karton ang mahimo ninyo nga gamiton ug puwede ninyo nga pintalan og puti ug butangan dayon og krus ang ibabaw bahin niini.

• Kung duna mo'y karaan nga panapton nga itom ug puti, puwes gamita dayon kini ug ibitay-bitay sa venue sa party.

• Aron makadaginot, ang inyong pagkaon kinahanglan nga barbecue ug puso. Strawberry juice ang inyong imnon,aron kunohay dugo ang inyong giinom.

• Pag-download mo og horror sound effects aron hugyaw ug makahadlok gyud ang inyong Halloween party.

• Pagmugna-mugna mo og lapida nga hinimo sa karton, ug mahimo ninyo ang isuwat ang pangalan sa mga nangapil sa party.

Pasta nga Buwad

Samtang nangita ko og angayan imantala niining maong pahina karong adlawa, usa ka recipe ang nakadapit sa akong atensyon niadtong Biyernes sa hapon: Tuyo Pasta. Of course  daghan kaayo ang ganahan og pasta, ako favorite gyud nako ang tuna pasta, as in. Apan kini nga pasta nakapahugyaw nako og pinakalit uy karon pa man ko nakasugat niini, o nakadungog ani. Pwes, ania ang recipe nga akong naukayan pinaagi sa http://panlasangpinoy.com: 

Ingredients

• 1 lb. spaghetti noodles

• 8 ounces bottled tuyo

• 6 tablespoons grated Parmesan cheese

• 1/2 teaspoon ground black pepper

•1/4teaspoon garlic powder

• 1/2 teaspoon dried basil

• 3 tablespoons extra virgin olive oil

Pamaagi

1. Lutua ang spaghetti noodles basi sa nakabutang sa package instructions. Ipadaplin usa.

2. Sag-a ang bottled tuyo aron mabuwag kini sa iyang mantika. Pinupinoha dayon ang buwad.

3. Sa usa ka dako nga mixing bowl,  isagol ang imong giluto na nga spaghetti noodles, gipinopino nga buwad ingon man ang Parmesan cheese. Sagola og maayo.

4. Isagol ang garlic powder, dried basil, ug ground black pepper. Isagol gyud og maayo.

5. Ibalhin og serving plate ug lafangan (kaon) na!

Bottled tuyo mani ang gigamit diri, pero pwede ra sab tingali og kana lang pinikas nga buwad, pritohon lang nato og pinalutaw sa mantika. Kay kun buot hunahunaon, experiment ra baya na ang pagluto, ikaw ray magbuotbuot sa imong ipangsagol depende sa musantop sa imong hunahuna. Halaa suwayi kuno ang buwad pinikas lang, kun lami gani, pakan-a ko! Hahahaha pakpak!