CCT Builders miilog sa solong liderato sa CELBA Second Conference
CEBU, Philippines — Natuman ang pangandoy sa CCT Builders nga magsolo sa liderato human nila gilubong ang MS Motosuit, 84-66 sa CELBA Second Conference Basketball Tournament niadtong Miyerkules sa gabii didto sa Canduman Housing gym, Mandaue City.
Lima ka players sa CCT Builders ang naka-double figures sa pagpangulo sa sentro niining si Marcial Marturillas nga midukdok og 16 puntos.
Mikamada sab og 13 puntos si Ariel Ocier sa CCT Builders nga mirehistro sa ikalima nilang daog sa unom ka duwa.
Ang co-manager nga sila si Roy Ermac ug Dr. Jun Borces uban ni Richard Madrid ang mitimbre’g 11 puntos matag usa sa CCT Builders nga miagi pa og daghang mga pagsuway sa wala pa nila maangkon ang kutas nga kadaogan.
Naggukod ang CCT Builders ni Engr. Chucho Tan sa nag-unang duha ka kuwarter ug diha na sila milabaw sa hingpit, 24-23 sa daginutong oras sa second period sa basket ni Ermac. Miburot ang ilang labaw ngadto sa 61-46 human sa tulo ka kuwarter, apan nahulga sila dihang mihiyos ang dako nilang labaw, 64-48 sa 3-point play ni Rodel Royo sa nahibiling 6:40 sa duwa.
Si Royo maoy nangulo sa MS Motosuit ni Lou Ornopia nga miratsada og 21 puntos, gisundan ni William Rama sa iyang 11 puntos.
Sa laing duwa, ang team Velasco mikulit sa ilang ikaduhang sunod-sunod nga daog pinaagi sa pagpilde sa team Cabiluna, 87-66.
Ang liga nga gipaluyohan ni Ronald Yap Elpa, nahimo pinaagi sa paningkamot sa presidente niining si PS/Insp. Dondon Coloscos sa abag nilang Lloyd Chavez, Richard Limosnero ug Willy Medillo.
Puntos matag usa
Unang duwa:
VELASCO (87) – Templado 12, Canas 12, Prieto 10, Velasco 9, Federez 9, Catinoy 8, Bathan 6, Pios 6, Abanid 5, Cano 4, Abarquez 4, Marabe 2.
CABILUNA (66) – Abapo 14, Sugay 11, Mahilum 9, Mayol 8, Limosnero 7, Ouano 4, Postrano 4, Jabas 4, Tayag 3, Cabiluna 2.
Ikaduhang duwa:
CCT Builders (84) – Marturillas 16, Ocier 13, Ermac 11, Borces 11, Madrid 11, Alburo 4, Quiñahan 4, Lavador 4, Beldera 4, Bucabal 4, Orellano 2.
MS Motosuit (66) – Royo 21, Rama 11, Bercero 8, Medillo 8, Asis 7, Yatan 6, Ubas 5. (BANAT NEWS)
- Latest
