Irving bida gihapon

CEBU, Philippines — Bisan og nagmaskara, hait gihapon ang abilidad ni Kyrie Irving sa iyang pagbalik og duwa diin kini mikadlit og 25 puntos alang sa Boston Celtics nga mikuniskunis sa Brooklyn Nets, 109-102 alang sa ika-13 nilang sagunson nga daog sa NBA kagahapon didto sa Barclays Center sa Brooklyn, New York.

Ang Celtics nagpabiling wa’y pilde sukad mahisukamod sa nag-una nilang duha ka duwa karon nga season ug ang ilang kalig-on masukod sa ilang pakigsangka batok sa defending champion Golden State Warriors karong Biyernes.

Si Irving nakapalta sa miagi nilang duwa gumikan sa injury sa iyang nawong human aksidenteng naigo sa iyang kauban nga si Aron Baynes niadtong Sabado. Nagpunay siya og kupot sa iyang maskara, apan wala kini makabalda sa iyang dinuwaan.

Ang Nets igo lamang nakapaduol ngadto sa kuwatro puntos gumikan kay si Irving mipasud sa iyang itsa sa katapusang 3:40 sa duwa ug dayon nakaiskor pinaagi sa iyang lay-up 35 segundos ang milabay aron pagpaginhawa og lawom sa Celtics. Human sa alley-op ni Jayson Tatum, si Irving milansang og duha ka free throws aron   hatagan ang Celtics og 106-96 nga bentaha.

Miabag ni Irving sila si Marcus Morris nga dunay 21 puntos ug 10 ka rebounds ug si Tatum nga mitali og 19 puntos.

Didto sa Houston, si DeMar DeRozan mitali og 27 puntos alang sa Toronto Raptors  nga mirehistro og dakong labaw sa first half dayon na ngadto sa pagbungkag sa Rockets, 129-113.

Si James Harden mihipos og 38 puntos, apan wa’y nahimo gumikan kay nabugto ang unom ka sunod-sunod nga daog sa Rockets.

Sa gubat tali sa mga silingang teams didto sa Texas, ang San Antonio Spurs midaog batok sa Dallas Mavericks, 97-91  ubos sa pagpangulo ni LaMarcus Aldridge nga mibahog og 32 puntos.

Nahimong mas mahinungdanon ang daog sa Spurs gumikan kay si Gregg Popovich mikulit man og rekord isip labing paspas nga NBA coach nga nakatali og 500 ka daog sa road games.

Gawas ni Aldridge, mikuha sab og atensiyon sa Spurs si Patty Mills nga mitikdol og 19 puntos.

Si rookie Dennis Smith Jr. miratsada og career-high 27 puntos, samtang sila si J.J. Barea ug Harrison Barnes mihipos og 16 puntos matag usa, apan silang tanan nahuyhoy ang abaga gumikan kay ang Mavs misukarap sa ika-13 nilang pilde sud sa 15 ka duwa. (BANAT NEWS)