Donaire moharong nA ni Hernandez

CEBU, Philippines — Mosaka na  pagbalik sa ring si kanhi five-division world champion  Nonito ‘The Filipino’ Flash Donaire aron sangkaon ang Mehikanong si Ruben Garcia Hernandez alang sa WBC silver featherweight title fight karon didto sa San Antonio, Texas.

Gipakita ni Donaire ang iyang kaandam sa maong away human siya mitimbang og 125.5 pounds atol sa weigh-in kagahapon.

Kini ang unang away ni Donaire human  siya huboi sa iyang WBC super bantamweight belt ni Jessie Magdaleno nga midaog pinaagi sa unanimous decision  niadtong Nobiyembre  sa miaging tuig didto sa Las Vegas.

Mao usab kini ang unang sangka ni Donaire ubos sa bag-ong boxing promotion nga Ringstar Sports human siya mibiya sa Top Rank Inc.

Si Donaire  nga nagbitbit og 37-4, 24KOs   dili mokompiyansa  ni Hernandez kay  giisip kini  nga usa ka delikadong kaatbang nga adunay   22-2, 9KOs record.

Sa iyang bahin, si Ringstar Sports CEO Richard Schaeffer masaligon nga mabuhi ang kasikat ni Donaire ug mabalik kini pagka-world champion sa dili madugay. (BANAT NEWS)