VHA nag-una na

CEBU, Philippines — Ang tres ug ang drayb ni Rickymhar Berdin sa daginutong oras sa duwa maoy mipadaog sa Veneranda Housing Association (VHA) nga mao na karon ang nag-una sa standing sa bracket  B  uban ang 4-0 record sa nagkainit nga  duwa  sa  9th  J&J Surplus Ballclub basketball tournament 2017.

Ang VHA ni Jojo Satuita midaog human makaipsot batok sa  Victorious Eagle ni Danrex Bayonla, 88-86 niadtong Huwebes sa gabii didto sa GT Academy gym sa Tayud, Lilo-an.

Nag-ambo na unta sa baba sa kadaogan ang Victorious Eagle human sila milabaw, 86-83 sa nahibiling 43 segundos sa duwa, apan si Berdin mitira og tres nga nakapatabla sa iskor, 86-all.

Si Berdin miburak og 40 puntos, lakip ang iyang lusot nga nakapadaog sa VHA, samtang si Michael Gandiongco mitampo’g 28 puntos.

Upat ka  players sa 3-1 nga Victorious Eagle ang mikabkab og double digits pinangulohan ni Titing Icot sa iyang 34 puntos, apan mikagar ang katapusan niyang itsa nga posible untang mohatod sa duwa ngadto sa overtime.

Sa laing aksiyon sa bracket B, ang D’ Jammers miiskor sa ikaupat nilang daog pinaagi sa paglubong sa Union Galvasteel, 84-68.Gipangulohan nilang Jessy Tubod ug Reynel Martinez ang daog nga nagkumboya’g 55 puntos. Ang D’ Jammers ni Albert Icot temporaryong nagsolo sa ikaduhang dapit uban ang 4-1 record.

Si Manolito Dejarme mitikdol og 17 puntos, samtang sila si Marvin Boyles ug Jaybee Gellocane mitimbre’g 16 ug 14 puntos matag usa sa Union Galvasteel ni  Arnold Labustro nga wala pa’y daog sa lima ka duwa.

Sa bugtong duwa sa bracket A, ang Rene Marketing nakatilaw na gyud og daog dihang ilang gitumba ang Road Warriors, 68-61.

Nagkumbinar og 32 puntos sila si Leonel Kangkee ug Kimler Cuyos aron pangulohan ang Rene Marketing nga maoy midiktar sa kinatibuk-ang duwa.

Si Genesis Pepito maoy topscorer sa Road Warriors nga mikandos og 20 puntos, gisundan ni John Sadaya sa iyang 14 puntos ug Vincent Pepito nga adunay 12 puntos.

Ang duha parehong nagbitbit og 1-3 nga baraha ning maong torneyo nga nahimo pinaagi sa paningkamot sa presidente nilang si Henry Agbon.

Ang liga gidumala ni commissioner Fury Trazona sa abag ni technical committee Chang Tejero, ingon man nilang Abel Bacalso, Noel Calo ug Choy Pilapil.

Puntos matag usa

Unang duwa:

D’ JAMMERS (84) –  Tubod 41, Martinez 14, Villosillo 9, R. Illustrisimo 4, Lorca 4, Yutucah 4, Doble 4, Icot 2.

UNION Galvasteel (68) – Dejarme 17, Boyles 17, Gellocane 14, Flores 6, Ravanna 5, Orongan 4, Judaya 2, Riveral 2, Macasero 2.

Ikaduhang duwa:

VHA (88) – Berdin 40, Gandiongco 28, Abella 6, Albaracin 6, Layese 4, Matario 2, Lecciones 2.

VICTORIOUS (86) – Icot 34, Sasing 13, R. Lascuña 12, D. Silorio 12, E. Lascuña 5, Bayonla 2, Cobong 2, Patalot 2, Badajos 2, RJ Jalang 2.

Ikatulong duwa:

RENE Marketing (68) – Kangkee 17, Cuyos 15, Ceniza 8, Pugoy 6, Sumayang 6, Arcasal 6, Amores 3, Maglasang 3, Egpas 2, Ganaton 2.

ROAD Warriors (61) –  G. Pepito 20, Sadaya 14, V. Pepito 12, Labus 6, Batista 4, Buangjug 3, C. Pepito 2. (BANAT NEWS)