Leonard mag-clinic sa China

CEBU, Philippines - Mobisita si San Antonio forward Kawhi Leonard sa China sugod karong adlawa aron magsilbeng coach sa mga youth clinics.

Si Leonard, ang Finals MVP sa dihang gisakmit sa Spurs ang kampiyonato sa NBA niadtong 2014.

Ang two-time NBA All-Star motaak sa Beijing ug Shanghai alang sa labing una niyang pagduaw

sa China.

Molanat og usa ka semana ang iyang misyon nga tabangan og palambo ang duwang basketbol sa maong nasud. Apil sa iyang mga kalihukan mao ang pagpatim-aw sa NBA Academy Zhejiang.

“I’m thrilled to travel to China to help grow the game of basketball,” matud pa ni Leonard.

“I’m also excited to see the fans’ passion and excitement for basketball and to experience the Chinese culture.”

Gawas sa clinic, si Leonard duna sa’y “meet and greet” sa iyang fans atol sa usa ka five-on-five tournament nga gipasiugdahan sa NBA alang sa mga dekalibreng players sa China.

Si Leonard nga duha ka higayon nahimong NBA Defensive Player of the Year ug kandidato pagka-MVP sa miaging season, maoy labing unang NBA player nga mobisita sa usa ka NBA Academy didto sa China.

Sa miaging NBA season, si Leonard dunay average nga 25.5 points, 5.8 rebounds, 3.5 assists ug 1.8 steals matag duwa. Mipatik sila og 61-21 record sa regular season, apan nahagba sa Western Conference finals batok sa Golden State Warriors. (BANAT NEWS)