Carzano hawod sa CEPCA non-masters chessfest

CEBU, Philippines - Si Johnny Carzano nakatabla ni Christian Pondoyo sa katapusang hugna, apan mao lamang kini ang iyang gikinahanglan aron sakmiton ang titulo sa Cebu Executives and Professionals Chess Association (CEPCA) Non-Masters Tournament niadtong Domingo diha sa Knight Attack Chess Cafe sa Robinsons Galleria Cebu.

Gikompleto ni Carzano ang 7-round Swiss system competition bitbit ang labing taas nga 6.5 points aron pagbulsa sa P3,000 nga ganti isip kampiyon.

Sila si Lemuel Montero ug Lester Belano milampos sa katapusan nilang  duwa  batok nilang Lumbab Armecito ug Christy Cabungcag aron pagposte og managsamang 6.0 points.

Si Montero hinuon maoy miangkon sa P2,000 nga ganti  alang sa ikaduhang dapit gumikan sa mas taas niyang tie-breaker. Si Belano nakadawat og P1,000 sa pagkalandig niini sa ikatulong puwesto.

Mipahiluna sa ikaupat hangtod sa ikaunom nga dapit uban ang 5.5 points mao sila si Joe Atillo, Christian Pondoyo ug Franklin Caylan, samtang naglangkob sa top 15 bitbit  ang   5.0  points mao sila si Lumbab Armecito, Richard   Gohetia Sr., Alex Bayubay, Zilberstein Torres, Christy Cabungcag, Sherwin Amad, Vicmil Pepito, Michael Lamb ug Manny Manzanares.

(BANAT NEWS)