Orihinal nga coach sa Lakers mipanaw
CEBU, Philippines - Sa wala pa sila si Phil Jackson ug Pat Riley, sa wala pa silang Gregg Popovich ug Larry Brown, ug bisan gani sa wala pa si Red Auerbach, duna na’y John Kundla.
Si Kundla, ang Hall of Fame coach nga migiya sa Minneapolis Lakers ngadto sa lima ka kampiyonato sa NBA, mipanaw na sa laing kalibotan kagahapon sa edad nga 101 anyos.
Si Kundla maoy gitamod nga orihinal nga coach sa Lakers.
“On behalf of the entire Lakers organization, I’d like to express our sadness at the passing of John Kundla,” matud pa ni Lakers president ug co-owner Jeanie Buss sa usa ka opisyal nga pamahayag.
“John played an important role in the history of the Lakers organization. Not only was he a Hall of Fame coach, he was our first head coach and led the organization to five NBA championships.”
Si Kundla nag-edad pa lamang og 31 anyos sa dihang gitimon niya ang Lakers niadtong 1948 diin ilang gipapirma si George Mikan, ang mangtas nga sentro nga mitabang kanila paghakot og lima ka korona sa NBA gikan niadtong 1949 hangtod 1954.
Sila si Kundla ug Mikan maoy nagdagkot sa kayo sa kalampusan sa Lakers nga ilang nadala sa ilang pagbalhin sa California pinaagi nilang Wilt Chamberlain ug Jerry West, Magic Johnson ug Kareem Abdul-Jabbar ug Kobe Bryant ug Shaquille O’Neal ning bag-ong henerasyon.
Si Kundla gibayaw ngadto sa Basketball Hall of Fame niadtong 1995. Sunod tuig nga natumong sa kasaulogan sa ika-50 nga aniversaryo sa NBA, gipasidunggan siyang usa sa 10 ka labing banggiitan nga coach sa liga.
Duna siya’y career record nga 423-302 uban sa Lakers sa wala pa moretiro niadtong 1959. (BANAT NEWS)
- Latest
