All-Stars migilak batok Boomerangs sa E-Leagues
CEBU, Philippines - Si Dean Junber Escalon mitali og 11 puntos, lima ka rebounds ug tulo ka assists sa dihang gilampurnas sa Teleperformance All-Stars ang Telstra Boomerangs, 62-42, sa Tanduay Athletics CSCC E-Leagues for Basketball niadtong Sabado diha sa City Sports Club-Cebu gym.
Midugang si Xavier Dico og 10 puntos ug 10 sab ka rebounds alang sa All-Stars, nga mipabuhagay og eksplosibong opensa sa ikatulong kuwarter aron pagpatikalbong sa Boomerangs.
Ang All-Stars naglabaw lamang og singko puntos sa halftime, 25-20, apan milusad kini og nagbagang 24-10 rally aron pag-abante og 19 puntos, 49-30, nga nakapatikyaob sa Boomerangs sa nahibiling 10 minutos sa duwa.
Sa laing aksiyon sa Elite Classic, ang ePerformax Reds miposte sa labing una nilang daog apan nag-agi usa kini og makuyaw nga dalan sa wala pa munas ginhawang mipatigbabaw batok sa Sykes Pioneers, 58-57.
Si Patrick Anthony Ybañez maoy nangu sa Reds uban sa iyang 15 puntos ug upat ka rebounds samtang si Clyde Heber Alob miamot og 11 puntos, unom ka assists, lima ka rebounds ug upat ka steals.
Sa Evo League, si Johnrey Girasol mipatuasik og 24 puntos, siyam ka rebounds, upat ka steals ug tulo ka assists sa dihang gipakaging sa QBE Generals ang Teletech Titans, 58-53, samtang si Robert Rebaño mikadlit og 19 puntos, lima ka rebounds ug tulo ka assists aron ituboy ang Tech Mahindra Tech Mighties ngadto sa 59-48 nga kalampusan batok sa Author Solutions, Inc. (ASI) Hardbacks. (BANAT NEWS)
- Latest
