Convergys kaging sa Accenture

CEBU, Philippines - Gipakuratan sa Accenture Sharks ang two-time defending champion Convergys Converters, 59-51, alang sa una nilang daog sa Tanduay Athletics CCSC E-Leagues for Basketball Season 13 niadtong Sabado diha sa City Sports Club-Cebu gym.

Si Junas Marion Misa mitali og 13 puntos uban ang upat ka assists, duha ka steals ug duha ka rebounds alang sa Sharks nga nagsandig sa mainit nga rally sa ikaduhang kuwarter aron patikangkangon ang Converters.

Alkansi og dos puntos, 9-11, ang Sharks milusad og 21-13 run aron sa pagkontrolar niini sa duwa sa hingpit atol sa halftime, 30-24.

Sila si Archie Batua, James Lester Navaja ug Ryan Edward Llanos miabag ni Misa pinaagi sa pagkumboya og 26 puntos.

Ang managsoong Franz Dionne ug Kenneth Dysam nakatigum og 32 puntos, siyam ka rebounds ug upat ka steals apan pareho silang naminghoy kay ang Convergys nakatilaw dayon og pilde sa ikaduha pa lamang nila nga duwa.

Sa laing aksiyon ubos sa Elite Classic, si Franco Angelo Cipriano mikadlit og 18 puntos uban ang unom ka steals ug lima ka rebounds alang sa Lexmark Stallions nga mipatid sa ePerformax Reds, 58-51, alang sa ikaduha nilang sagunson nga daog.

Si Sylvester Millevo midugang og 11 puntos ug upat ka rebounds sa Stallions nga wala na molingi pa sukad mibulhot ngadto sa 35-25 nga labaw sa halftime.

Dunay 15 puntos ug pito ka rebounds si Robert Gilo samtang si Patrick Anthony Ybañez miposte og 12 puntos apan pareho silang way nahimo kay ang Reds nasugamak sa ikaduha nilang sunod-sunod nga pilde.

Sa Evo League, si Stuart Foot miiskor og 16 ug si Johnrey Girasol midugang og 14 puntos, upat ka rebounds ug upat ka steals sa dihang gilabhan sa QBE Generals ang Optum Knights, 64-43, alang sa ikaduha nilang daog, samtang ang duwa tali sa Streamline ug Teletech gipaubos pa sa usa ka review. (EBV) (BANAT NEWS)