Floyd Mayweather isunod ni Pacquiao

CEBU, Philippines - Mahinungdanon alang ni Manny Pacquiao nga makahimo og impresibong kadaogan batok ni Jeff Horn karong Domingo (oras dinhi sa Pilipinas) didto sa Suncorp Stadium sa Brisbane, Australia tungod sa daghang mga  rason, usa na niini mao nga posible nga ‘rematch’ uban ni Floyd Mayweather Jr.

Ang duha ka labing sikat nga boksidor sa ilang henerasyon nagsangka duha na ka tuig ang nakalabay didto sa Las Vegas diin si Mayweather midaog pinaagi sa ‘unanimous decision’.

Nagtuo ang kampo ni Pacquiao nga dili lisud si Mayweather nga hagiton og ‘rematch’, apan kinahanglan nga mapakita ni Pacquiao nga anaa gihapon kaniya ang kalagsik ug kusog aron mahimong interesante ang maong away.

Nabuhi og paglaum ni Pacquiao nga makaharong niya pag-usab si Mayweather human ang Amerikanong boksidor mihukom nga mohaw-as gikan sa retirement aron makigsangka ni Conor McGregor sa Agosto didto sa Las Vegas.

Ang duha nagagikan sa duha ka managlahing sports. Si Mayweather usa sa labing banggiitan nga mga boksidor sa kasaysayan, samtang si McGregor eksperto sa mixed martial arts ug kasamtangang hari sa Ultimate Fighting Championship. (BANAT NEWS)