2 nasikop, 1 nakasibat sa drug operation

CEBU, Philippines - Giilang high value target nga taga Sitio Riverside, Barangay Pahina Central, Dakbayan sa Sugbo ang nasikop atol sa buy-bust operation niadtong Biyernes.

Ang dinakpan mao si Maribel Sunit alyas Mabel, 38-anyos ug residente sa naasoy’ng lugar.

Nakuha gikan kaniya ang napulo ka gagmay’ng pakete sa gidudahang shabu.

Sulod sa pipila ka adlaw, gipaubos og surveillance ang suspetsado.

Laing durugista ang nadakpan sa nag-roving nga kapolisan sa may dalan M. dela Concepcion sa Barangay Suba, Dakbayan sa Sugbo niadtong Biyernes sa gabii.

Nasakpan nga naghupot og ilegal nga drugas si Arlando Cabasan diin nakuhaan kini og tulo ka medium nga putos sa gituohang shabu nga mobalor og P24, 500.

Samtang nakasibat sa mga kamot sa kapolisan sa Dakbayan sa Talisay si Marlon Fernande, ang giilang tigpayuhot og ilegal nga drugas sa Sitio      Bulahan sa Barangay Maghaway.

Matud ni PO2 Edwin Campomanes sa Talisay City Police Station nga nakadawat sila og taho kabahin sa kalihukan ni Fernandez hinungdan sa ilang gihimong operasyon.

Pag-abot nila sa lugar, ngitngit ang panimay niini mao nga naglisod sila. Pag-abot sa back-up nilang mga kauban, diha na nabulabog ang ilang operasyon kay daghan nang tawo nga ni-usyoso hinungdan nga nakasibat ang suspek gumikan sab sa panimalay niini nga adunay tulo ka pultahan.

Bisan og nakasibat, pasakaan gihapon og kaso sa kapolisan si Fernandez kay nahimo man ang buy-bust operation diin nakuhaan kini og usa ka pakete sa gidudahang shabu nga maoy himoong ebidensiya sa pagpasaka og kaso. (BANAT NEWS)