Banat ( Leaderboard Top ), pagematch: 1, sectionmatch: 1

10th Olango Challenge banatan na

CEBU, Philippines - Kapin sa  100 ka swimmers gikan sa nagkadaiyang dapit sa nasud ang mopakita na’g aksiyon sa 10th Olango Challenge karong buntag didto sa Pacific Cebu sa dakbayan sa Lapu-Lapu.

Kun itandi sa mga miaging edisyon, karon maoy labing lisud nga hagit gumikan kay ang mga tadhang entrante naglaraw man nga makaangkon og luna sa Philippine team alang sa Southeast Asian Games didto sa Malaysia karong Agosto.

Kini kay ang maong kompetisyon, nga naglangkob og 3K ug 6K category, kabahin man sa gipahigayon nga try-out sa Philippine Swimming Inc. sa tinguha nga makahagpat og lig-on nga mga representante sa nasud sa open water swim sa umaabot nga SEA Games.

Mga pambato sa Sugbo mao sila si Loren Dale Echavez sa women’s division ug silang Andrew Kim Remolino ug Michael Ichiro sa men’s class.

Kay usa man gihapon kini ka fund-raising event, kansang tinguha makapatukod og daghang mga classrooms sa isla sa Olango, duna gihapo’y fun division sa duha ka mga kategoriya.

Kinahanglan ang usa nag-edad na og 14-anyos aron makasalmot sa maong makutas nga lumba sa langoy nga gipasiugdahan sa Philippine Business for Social Progress (PBSP) inabagan sa Philippine Swimming, Inc. (BANAT NEWS)

  • Follow Us: