Grenade explosion sa Maynila: 7 sugatan
MANILA, Philippines - Pitong magkakapitba- hay kabilang ang isang menor de edad ang nasugatan sa pagsabog ng granada na inihagis ng isang seaman sa Crisolita St., San Andres, Bukid, Maynila, kamakalawa ng hapon.
Ginagamot ngayon sa Ospital ng Maynila at Manila Doctors Hospital ang mga biktimang sina Reyno Mijares, 63, ; Felix Cruz, 65; Leonilda Cruz, 25; Romeo Padica, 55; Jose Abelardo III, 43,; Maribeth Geronimo, 53, at Judilyn Samillano, 16, estudyante, dahil sa mga tinamong sugat sa katawan.
Bugbog sarado naman sa taumbayan at nakapiit na ang suspek na si Darwin Hinog, 39, ng Hulo, Mandaluyong City at dating residente ng lugar na pinalayas noong nakaraang taon sa kaniyang inuupahan dahil sa paggamit umano ng iligal na droga.
Sa ulat mula sa Manila Police District-Station 6, naglalakad ang mga biktima sa nasabing kalye nang may biglang sumabog dakong alas-2:50 ng hapon nitong Linggo.
Nakita umano ang suspek na naghagis ng granada at tumama sa steel gate ng isang bahay at tuluyang sumabog.
Bukod sa nasugatang mga naglalakad ay nahagip din at nasira ang ilang sasakyan na nakaparada sa lugar.
Sa impormasyon ng pulisya, si Hinog ay nagtanim ng galit sa kanyang dating landlord na nagpalayas sa kanya noong nakaraang taon at nagbanta na hahagisan ng granada ang nasabing paupahan.
Nahaharap na sa reklamong attempted murder, attempted homicide in relation to Republic Act 7610 (Child Abuse, Serious Physical Injuries at Maliscious Mischief ang suspek.
- Latest