Nietes-Fuentes selyado na
BACOLOD CITY, Philippines – Gawas sa abiba unya sa iyang mga kababayan, si two-division world champion Donnie Nietes nakaangkon og dugang motibisyon sa umaabot niyang pagdepensa sa iyang WBO light flyweight title batok sa Mehikanong challenger nga si Raul Garcia karong Sabado.
Kini human gipahibalo ni ALA Promotions President ug CEO Michael P. Aldeguer nga naselyado na ang away nilang Nietes ug ni Mexican star Moises Fuentes nga maoy main event sa ikaduha nilang Pinoy Pride event didto sa Amerika karong Septiyembre 24 didto sa StubHub Center sa Carson City, California.
Nagkanayon si Aldeguer nga mao kini ang labing daku nilang kolaborasyon uban sa Zanfer Promotions sukad sa sangka nilang Juan Ponce de Leon ug Rey ‘Boom Boom’ Bautista siyam na ka tuig ang milabay.
Giklaro hinuon ni Aldeguer nga ang tanan mag-agad sa resulta sa away nilang Nietes ug Garcia sa Pinoy Pride 36 ugma sa gabii sa University of St. La Salle Coliseum dinhi.
Kini nagpasabot nga kun si Nietes mapilde, hayan nga makig-rematch siya ni Garcia imbes nga harungon si Fuentes karong Septiyembre didto sa Amerika. (BANAT NEWS)
- Latest
