Goldberry, transporters nag-una sa SHAABAA
CEBU, Philippines - Midaog na sab ang Petron Goldberry ug ang RDAK Transporters aron mangu sa tagsa-tagsa nila ka dibisyon sa 20th SHAABAA Cup niadtong Miyerkules sa SHS old campus gym sa Gen. Maxilom Ave..
Ang Petron Goldberry midaog sa RDAK Stallions, 62-58 alang sa ilang 6-0 record sa Division A, samtang ang RDAK Transporters mipilde sa Autolab, 40-30 aron mosakmit sa solong liderato sa Division B bitbit ang 6-1 record.
Si Leigh Dixon mao lang nakahimo’g double figures alang sa Petron sa iyang 11 puntos, samtang tulo ka players ang mihimo’g double figures alang sa Stallions.
Sa lain pang mga duwa, ang Bayfront Hotel Cebu mipilde sa Chick@Phil, 75-43 alang sa ilang 3-3 nga baraha.
Si Eduard Cabahug maoy nangu sa Bayfront sa iyang 29 puntos, samtang si Brennon Gothong maoy nangu sa Chick@Phil Basic sa iya sab nga 10 puntos.
Midaog sab ang Caltex Delo batok sa Dynamic Power, 48-46 sa pagpangu ni Dennis Que sa iyang 19 puntos. Ang Dynamic Power gipangulohan sab ni Rodrick Mangubat nga adunay 31 puntos.
Ang White Gold Club midaog sab batok sa Filmon Finishing Studio pinaagi sa 68-31 nga demolisyon.
Sila si Romeo Alejandro, Eduardo Rama ug Teddy Lee nagkumboya’g 42 puntos alang sa White Gold Club nga adunay 2-5 record.
Ang Filmon Finishing Studio (1-5) gipangulohan nilang Aldie ug Lester Canizares sa ilang 15 ug 11 puntos matag usa. (BANAT PALARO)
- Latest
