Magis Eagles midagit solong liderato sa CESAFI
CEBU, Philippines- Nasakmit sa Sacred Heart School-Ateneo de Cebu (SHS-AdC) Magis Eagles ang solong liderato human sila makaipsot gikan sa mga kamot sa University of the Visayas (UV) Baby Lancers, 74-71 sa secondary match sa 14th Cebu Schools Athletic Foundation, Inc. (CESAFI) kagahapon didto sa Cebu Coliseum.
Ning pagsuwat, nagpadayon pa ang duwa tali sa 2-1 nga University of San Carlos (USC) Warriors ug ang 1-2 nga University of Cebu (UC) Webmasters sa collegiate division.
Gidominar sa Magis Eagles ang duwa ilabi na sa second half diin didto sila nagmangtas sa sayong bahin sa third period ug namintinar nila ang double digits lead.
Ang Magis Eagles mikulit sa ilang labing dakung labaw nga 21 puntos, 68-48 human sa undergoal ni Jose Piero Dominic Longa sa nahabiling 4:15 sa fourth period. Inay maluya, ang Baby Lancers kalit lang nalagsik human makapasulod og upat ka three pointers si Theo Joshua Flores nga maoy nagduslit sa mainitong rally.
Mihugyaw pag-ayo ang mga fans sa UV dihang nakapasulod pa og laing tres si Orlan Wamar aron mosikit, 68-72 sa katapusang 19.2 sa duwa sa wala pa ang katapusang tres sa Baby Lancers gikan ni team captain John Carl Escalona, 71-74 nga nahulog na lang nga garbage points tungod kay may 4.7 segundos na lang ang oras nga nahabilin.
Ang Magis Eagles nga nagtangag og 3-0 nga baraha gipangulohan ni Joshua Sinclair, kinsa mipugnit og 22 puntos, samtang silang Longa ug Felixberto Jaboneta Jr. mitampo’g 13 ug 12 puntos matag usa.
Ang 3-1 nga Baby Lancers gipangulohan sab ni Flores pinaagi sa iyang 21 puntos, gisundan ni Wamar nga adunay 14 puntos ug Escalona nga mitampo’g 11 puntos. (BANAT NEWS)
- Latest
