EDITORYAL - Total OFW ban

Kataw-anan kining pagsaway sa gobiyerno sa Kuwait ug ang pagkondenar sa pamahayag ni Presidente Duterte nga papaulion ang tanang mga Pilipinong nagtrabaho sa maong nasud. Kining ilang hulga nga maguba ang maayong relasyon sa duha ka nasud tungod sa pamahayag sa presidente, dili ni angay’ng hatagan og gibug-aton kay kon buot hunahunaon, sila maoy nagkinahanglan sa mga skilled workers nga mga Pilipino.

Si Kuwaiti Minister of Foreign Affairs Sheikh Sabah al-Khalid al-Sabah  namahayag niini kauban si US Secretary of State Rex Tillerson kinsa mitambong sa  tigum alang sa kalibutanong kowalisyon kontra Islamic State. Pagkakaron, adunay 130 mil ka OFWs nga nagtrabaho didto sa Kuwait, sama sa mga engineers, managers, hangtud na sa mga kasambahay. Ang mga Pilipino, matud pa ni al-Sabah, labing buotan nga foreign workers didto sa ilang nasud. Nagpasabot nga wala kaayo’y mga Pinoy nga makasala sa ilang mga balaod.

Apan nganong wala man nila panalipdi og maayo ang mga OFWs didto? Nganong daghan man kaayong kaso sa pagpangabuso sa mga Pinoy workers didto? Niining bag-o lang, usa ka Pinay nga katabang ang gipatay ug nadiskubrehan nga gisulod sa freezer. Ang Kuwaiti government wala gyud molihok aron pangitaon ug mataral sa hukmanan ang nagpatay sa igsuon natong Pinoy. Busa dili mabasol si Duterte sa iyang desisyon pag-total ban sa mga OFWs didto sa Kuwait.

Isip presidente sa nasud, responsibilidad ni Duterte nga panalipdan ang mga Pilipino. Maayo ang diplomatikong relasyon sa duha ka nasud busa gipaabot nga trataron unta og maayo sa mga Kuwaitis ang mga Pinoy, sama sa atong pagtratar kanila dinhi. Dako kining problema sa mga pamilya sa mga OFWs, apan kon ingon usab niini ang dangatan sa mga OFWs, wa’y mosugot nga kabanay nga abusaran ang ilang kadugo didto. Ato usab nga masukod kon unsa’y mahimo sa kagamhanan pagpangita og kabalhinang trabaho sa mga OFWs nga mapugos pagpauli dinhi.