Hari sa tanan

Wala’y gipili nga relihiyon ang nagdebosyon sa Balaang Bata nga si Señor Santo Niño, ma Katoliko man, o lain nga tinuohan. Napamatud-an nako kini atol sa akong pagpakighimamat sa mga tawo niadtong nakalabay nga semana samtang naghimo ako og mga  Sinulog feature stories.

Tungod lagi kay nagkaduol na ang pangilin sa Batang Hesus, nangita ako og mga sugilanon sa mga deboto nga nakasinati og milagro gikan kang Señor Santo Niño.

Sa tanang tawo nga pwede nako ikatagbo, ang usa ka protestante pa gyud ang akong nakaplagan.

Usa siya ka magtutudlo sa public elementary school sa dakbayan sa Lapu-Lapu.

Bisan og dili siya Romano Katoliko apan lupigon pa niya ang uban sa iyang debosyon sa Balaang Bata nga gitawag niya nga Tata Niño.

Kanunay niyang iuban ang gamay nga imahen sa Señor nga isulod niya sa iyang pitaka.

Miangkon siya sa sinugdanan nga miuban siya sa novena mass niadtong tuig 2007 pa, tungod lang sa kakuryoso kon unsa’y talan-awon sa Basilica.

Mao na diay kadto ang pagtuktok sa Niño kaniya kinsa maoy niganoy kaniya sa paghigugma kaniya.

Kada tinuig nga pangilin, wala’y sipyat nga motambong ug motapos gyud sa novena ang maestra, kada kaadlawon.

Bisan pa man sa iyang gugma sa Balaang Bata, nagpabilin siya sa iyang relihiyon.

Samtang laing deboto akong nahimamat sa atubangan sa Basilica nagkawat-kawat intawon sa pagtambong sa unang adlaw sa novenaryo kay nahadlok siya nga masayran sa iyang bana nga protestante usab. Dili usab siya gusto nga magkadisgusto sila ug ang iyang pamilya.

Bisan og nag-convert na unta siya sa relihiyon sa iyang bana, apan padayon siyang miyukbo sa Batang Hesus. Dinhi nato masukod nga si Señor Santo Niño wala’y gipili, ma Katoliko man, o dili, na-magnet sa iyang kaaghop, isip Hari sa tanan.