Likay sa pabuto

Gibuksan niadtong adlaw’ng Sabado ang display area sa mga firecrackers sa Barangay Babag, dakbayan sa Lapu-Lapu, nunot sa nagkaduol na nga Pasko.

Apan hilabihan ka mingaw ang mga tindahan ug matud sa mga tigbaligya nga halos ma-zero sila sa usa ka adlaw tungod kay wala may namalit sa ilang baligya.

Tingali, tungod kay mao pa man ang pagsugod nila sa pagpaninda, o ba kaha walay mga tawo nga namalit kay bati ang panahon.

Apan mas dako ang posibilidad nga nahigmata na ang mga tawo sa ka delikado sa firecracker ug mura’g gausik-usik lang sila sa kwarta kon ipalit lang nila og mga pabuto.

Panid-an pa kini basin og inig-abot na sa Pasko ug Bag-ong Tuig, modagsa ang mga mamalit og pabuto. Ang mga local government units nagbutang usab og mga firecracker safety zone sama sa dakbayan sa Lapu-Lapu nga kada barangay dunay firecracker zone.

Gitumong kini aron seguradong luwas ang katawhan gikan sa mga digrasya mugna sa pabuto. Apan nabantayan nako nga dili man aktibo kaayo ang Department of Health sa naandan nilang kampanya nga Iwas Paputok.

Dinhi lang sa rehiyon-7, wala pa may kisaw ang DOH mahitungod sa ilang information dissemination sa kadaot nga mamugna sa pabuto. Lahi ra kaayo kaniadto sa panahon ni kanhi Director Suzzana Madarieta nga subsob ang presscon kabahin sa programa sa DOH.

Apan karon mura’g luya man ang DOH sa ilang lakang pagpahimangno sa katawhan. Dili hinuon nato isalig ang tanan sa DOH ug LGU ang pagpahimangno sanglit kita mismo nga mga tawo nasayod kon unsay angayan natong buhaton pagseguro sa atong kaluwasan.

Likay na lang gyud sa pabuto aron dili madisgrasya.