Unsay dokumento nga angay pangayuon sa buyer?

Dear Atty. Divine,

Dunay property nga gi-offer kanako ug sa dihang akong nakita ang property, na-interes ko kay adunay mga tanom nga mangga. Dili titulado ang property ug ang Tax Declaration niini nakapangalan sa ilang mama nga patay na. Una sab nga namatay ang ilang papa ug ang nahibilin mao na lang ang tulo nila ka anak.

Ang usa niini tua sa US nagtrabaho, ang usa tua sa Manila ug ang usa ra ka anak ang ania diri sa Cebu. Ang property dia ra sab diri sa Cebu. Ang akong pangutana kon unsa man ang dokumento nga akong pangayuon gikan sa seller ug mahimo ba nga ang usa ka igsuon nga ania dinhi sa Sugbo mao ra ang mopirma sa Deed of Sale? Daghang salamat. — Carmelito

Dear Carmelito,

Ang imong pangayuon nga dokumento gikan sa seller mao ang certified true copy sa tax declaration, tax clearance, death certificate ug Certificate of no landholdings sa ilang mama nga namatay gikan sa Cebu City Assessor, Mandaue, Lapu-Lapu ug sa Provincial Assessor.

Unya kinahanglan sab nga mo-execute og Deed of Extrajudicial Partition with Sale ang tulo ka anak. Kon ang duha ka anak dili makapirma niini kinahanglan nga mo-execute og Special Power of Attorney kon SPA ang duha in favor sa ilang igsuon nga nahibilin sa Cebu aron maoy mopirma sa dokumento in their behalf.

Inig process unya nimo sa transfer, kinahanglan mo nga mobayad sa Estate Tax gawas sa Capital Gain ug Documentaty Stamp Tax nga inyong bayran. Thanks and God bless. — Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.