EDITORYAL - Martial Law sa Mindanao

Gilugwayan na og usa ka tuig ang Martial Law didto sa Mindanao nga maoy hangyo ni Pres. Duterte ngadto sa kongreso. Maayo ba kini o dili maayo sa nasud?

Ang rekomendasyon ni Duterte iyang gibase gikan sa panahom ug rekomendasyon usab sa kadagkoan sa Department of National Defense, Armed Forces of the Philippines ug sa Philippine National Police.

Kon basehan ang nahitabo sa Mindanao sud niining tuiga nga diin gisakop gyud sa mga teroristang Maute-ISIS ang tibuok siyudad sa Marawi City makiangayon lang gyud ang gibuhat sa presidente.

Paagi kadtong pagputol sa sungay niining mga terorista ug mga kriminal nga naghamok sa kalinaw sa nasud. Sa pangutana kon maayo ba kini, magdepende kon asa makaayo? Kon sa negosyo maoy hisgotan posibleng dunay negatibong epekto apan aduna say positibong epekto.

Sa positibong epekto, mas mabantayan og maayo ang mga patigayon ug dili magpanghadlok ang mga negosyante ug mga konsumidor kay daghan mang security forces sa palibot.

Ang negatibo lang niini, posibleng dili maayong tan-awon para sa mga turista ang presensya sa mga armadong polis ug sundalo nga maglibot-libot diha sa mga siyudad nga daw kanunay adunay gubat.

Sa seguridad og kaluwasan sa tanan ang hisgotan parehas gihapon, adunay negatibo ug aduna say positibo. Sa negatibo, dunay posibilidad nga abusaran sa mga security forces ang martial law ug matumban ang katungod sa mga inosente.

Ang positibong makuha gikan sa martial law, mas mapadali sa security forces ang pag-aresto niadtong mga tawo o indibidwal nga naghimo og mga krimen ug nalambigit sa terorismo nga walay pagpanuko ug pagduhaduha.

Tanang desisyon sa presidente dili gyud mahitabo nga way mokontra ilabi na sa kaparehas sa Pilipinas nga adunay kagawasan ang tanan nga makapadayag sa ilang opinion ug pagsupak basta wala nila malapas ang balaod.

Bantayan lang gyud nga dili moabuso ang kapolisan ug kasundalohan ug makayatak na hinuon sa katungod sa uban.