Mga sakit nga mamugna sa Dengvaxia

Gawas sa severe dengue, unsa pa man ang mga posibleng komplikasyon nga nagpaabot sa mga bata nga nabakunahan og Dengvaxia?

Pipila ka bulan ang nakalabay duna koy naka-estorya nga usa ka opisyal sa barangay nga kadugo usab sa usa ka health official sa usa ka local government unit sa habagatan sa Sugbo.

Matud niya nga sekreto siyang gipahimangnoan  sa iyang kadugo nga dili gyud pa-injectionan og dengue vaccine ang ilang mga bata tungod sa mga dautan nga epekto niini.

Posible kunong makaangkon og mga balatian nga adunay kalambigitan sa dugo ang mabakunahan sa dengue vaccine.

Ang sekreto ra unta nga impormasyon mikatap sa barangay ug dihang miabot na ang schedule sa pag bakuna, wala nay mga bata nga nangadto sa health center.

Ang health official mipatawag sa barangay official ug gisukmatan nganong gipanabi niini ang secret information nga nakaapekto sa ilang vaccination program. Ang katabian sa barangay official maoy nakaluwas sa mga bata gikan sa peligro nga dulot sa anti dengue vaccine.

Bitaw  atol sa among panag-estorya sa opisyal, wala ko kaayo motuo sa iyang gi-estorya kay abi nako nga seguradong luwas gikan sa peligro ang Dengvaxia tungod kay giduso man kini sa gobiyerno.

Ang impormasyon nga akong nasayran maoy nakapugong kanako aron dili pabakunahan ang akong anak.

Ang severe dengue ra ang nasentro sa hisgutanan karon diin ang mga bata nga wala pa masakit og dengue unya mabakunahan.

Nganong gikinahanglan man nga monitoron ug taas nga katuigan ang mga vaccinated children?  Basin tinuod nga aduna pay mas grabeng balatian nga makuha gikan sa Dengvaxia.

Karon pa lang mas maayo seguro ibutyag na sa hingtungdang ahensya ang uban pa nga mga komplikasyon nga makuha sa mga bata.

Makamugna man kini og dugang kabalaka sa katawhan apan mas maayo kining mapangandaman.