Ang national ID System

Naaprobahan na kuno sa Kongreso ang National ID System ug gamay na lang ang kuwang nga mapirmahan ni Presidente Digong Duterte ug mahimo kini nga balaod aron mahan-ay na ang Implementing Rules & Regulations (IRR) ug maimplementar na kini sa tibuok nasud.

Hinumdoman nga dugay na kaayo kining gilaraw sa atong gobiyerno, daghan na nga mga administrasyon ang nanglabay, apan, wala gayud kini ma-realized. Kini, gumikan sa daghang misupak niini.

Giingon nga mo-encroach kuno kini sa atong privacy, makahulga ug makayatak sa mga tawhanong katungod sa katawhan, ug molili sa mga pribadong kalihokan ug personal circumstances niini.

Mao kini ang ilang mga kabalaka, nga tan-aw nako, bunga lang kini sa ilang mga wild imagination. Wala’y mga sukaranan ug kapasikaran. Unfounded fears.

Kahinumdoman usab nga sayo pa, ang pundok sa mga ekonomista, ang Foundation for Economic Freedom (FEF) misugyot nga banhawon sa Duterte administration, ang mga laraw pagpahigayon sa National ID system – pag-require sa tanang molupyo sa tibuok nasud paghupot og uniform nga government-issued nga identification card.

Sa ato na nga giingon, dunay misupak kay tingali unya kuno og abusahan sa gobiyerno, pagpanghasi ug pagpanggukod sa mga yanong lungsoranon, ilabi na sa mga dili makauyon sa pagpadagan sa gobiyerno.

Sa mga proponent sa ID system, ang maong mga kabalaka mga speculation lang gyud ug wala’y lig-on nga sukaranan. Dako kaayo ang mga advantages sa ID system alang sa katawhan.

Una, makahatag kini’g dakong kasayon sa mga yanong lungsoranon, pag-transact og business with any government institution, ingon man, with private institutions, sama sa mga bangko.

Ikaduha, makatabang usab kini sa gobiyerno pag-ila sa mga beneficiaries sa welfare grogram niini.

Ikatulo, kalikayan kining giingon nga  pangilad sa internet, online o offline, kay masuta na man ang identification sa mga mogamit niini, ug,

Ikaupat, dili na maka-fake ang mga criminal sa ilang mga identity. So, timbang-timbangon, mas dako ang mga advantages sa ID system kay sa mga kabalaka nga makayatak kini sa privacy sa katawhan. Ang gobiyerno maghipos sa mga personal nga kasayoran sa matag lungsuranon, himoon ang national data collection.

Ang gikinahanglan mao kining mosunod: 1) Name; 2) Home address; 3) Sex; 4) Picture;  5) Signature; 6) Date of birth; 7) Place of birth; 8) Marital status; 9) Name of parents; 10) Height; 11) Weight; 12) Two index fingers & two thumbmarks; 13) Any prominent distinguishing features, like moles; 13) tax identification number (TIN).

Maka-encroach ba ang maong mga kasayoran sa imong privacy?