Walay labot si Tommy uy

Maayo kay nadakpan na usab sa kapolisan ang ikaduha nga suspek sa pagpatay ni Ermita Barangay Captain Imok Rupinta. Mura’g nagkanindot ang kalamboan sa kaso tungod kay matud sa mga polis nga nakakuha sila og CCTV footage nga magpakita nga si Jimmy Largo didto gyud sa Tayud, Liloan pipila ka gutlo sa wala pa pusila si Rupinta.

Wala gyud hinoon ko makakita sa mao nga footage gikan sa CCTV. Ang akong nakita mao ra ang gipublikar sa mga mantalaan, pero dili kaayo klaro ang panagway sa tawo nga nagsul-ob og kawo, apan matud sa mga polis nga may mga taga Ermita nga nakaila niini nga mao gyud si Largo.

Kon tinuod man gani gyud nga ang tawo nga nakuha sa CCTV footage mao si Largo, makaingon ko nga namakak diay si Largo sa iyang pag-ingon nga dihang gipatay si Imok, diha ra siya sa Ermita.

Pagsuwat nako niining maong lindog, ang giingong kauban ni Largo pagpatay ni Rupinta, padayon pa nga gisukit-sukit sa mga polis, sa pamasin nga mahibaw-an nila kinsa gyud ang nagsugo kanila.

Kanindot kon mahibaw-an kinsa gyud ang nagpapatay ni Rupinta.

Ako hinoon, nagtuo gyud nga gipatay si Rupinta tungod kay siya ang nagtug-an nga daghang video karera ug moli-moli nga nag-operate sa Ermita ug hinungdan nga nasakmit kini sa mga polis, mga duha ka buwan na ang nakalabay.

Gitug-anan ko ni Rupinta kaniadto nga ang mga illegal gambling machines gipanag-iya sa duha ka “hitmen” ug mao nga nagtuo ko nga ang maong tawo maoy nagpapatay sa kapitan.

Ang maong mga hitmen nagpayuhot usab og shabu sa Ermita nga gigukod usab ni Rupinta.

Ang giingon sa uban nga politika ang hinungdan nga si Rupinta gipatay, mura’g layo ra g’yud kaayo kini sa tinuod.

Nasayod ko nga si Mayor Tomas Osmeña maoy gituohan sa uban nga nagpaluyo sa pagpatay ni Rupinta, apan wala gyud ko magtuo niini.

Nganong patyon man ni Osmeña si Rupinta nga dili man kini hulga sa iyang pagka mayor. Estrikto tan-awon si Tommy, apan nasayod ko nga dili ingon niini og batasan ang mayor nga mopatay og tawo.

Kon tuohan nimo nga makahimo pagpatay og tawo si Tommy, ang iya na lang kaatbang sa politika? Apan makita man ninyo nga wala ma’y guwardiya nga maglakaw-lakaw ang kontra sa politika sa mayor, ug wala man lagi na patya?

Ang angay’ng tutokan sa kapolisan mao ang kalambigitan sa drug lord ug tag-iya sa mga illegal gambling machines diha sa Ermita sa pagpatay kang Rupinta.