EDITORYAL - Drugas sa jail

Bisan unsa na lang g’yud ang pamaagi nga himoon sa mga tawo aron makapalusot sila og gidiling drugas ngadto sa Cebu City Jail. Suwerte lang kay higpit na kaayo ang pagbantay karon sa bilanggoan sa dakbayan ubos sa pagdumala ni Jail Superintendent Renante Rubio.

Kon higpitan lang g’yud lagi ang pagbantay sa bilanggoan pinaagi sa pagrekisa sa mga tawo nga mosulod, ug ayuhon paghiling ang mga butang nga ilang dad-on, unya magbantay usab pag-ayo ang mga guwardiya nga gidestino sa tower, makuli nga makapalusot pa og shabu sa prisohan.

Kaniadtong Domingo, dunay babaye nga gipugos pagpasulod ang dakong putos sa shabu sa iyang kinatawo. Wala tingali siya magtuo nga masakpan gihapon kay tan-awon man g’yud pag-ayo sa guwardiya bisan ang mga pribadong parte sa lawas sa mobisita sa bilanggoan.

Sa miaging adlaw, ang mga nubain ampules gisulod usab ipon sa pagkaon. Bisan unsa na lang gyud ang nahuna-hunaan nga paagi aron lang g’yud makapalusot og shabu. Wala pa hinoon masakpi nga adunay magdala og hinog nga saging nga ipasok ang shabu.

Kinahanglan nga si warden Rubio magbutang gyud og iyang sinaligan diha pa lang sa ganghaan sa bilanggoan kay dili imposible nga may mga tawo nga gisaligan sa pag-inspection kaniadto nga kakonsabo na sa mga tigpayuhot og drugas.

Bisan ang mga kauban nila nga jail guard angay’ng hilngon usab inigbalik nila sa bilanggoan kay dili imposible nga sila maoy nagdala og shabu aron ipayuhot sa mga priso.

Ang mga kinompra nga pagkaon alang sa kusina sa bilanggoan usa sa gituohan nga anha ipaagi ang mga drugas kay dili na kini susihon pag-ayo sa mga guwardiya kon mosulod.

Dakong hagit karon ni warden Rubio nga masanta niya ang pagpayuhot og drugas sa bilanggoan sa dakbayan, ug si Rubio nga nadestino na sa bilanggoan kapin sa 20 ka tuig na ang nakalabay, suheto kaayo sa mga binuang.