EDITORYAL - Angay g’yud nga mananghid

Ang administrasyon ni Mayor Tomas Osmeña gusto g’yud nga ang dakbayan sa Sugbo mogamit og luna diha sa karaang landfill sa Barangay Inayawan aron himoon nga Material Recovery Facility (MRF). Diha sa maong lugar hagpaton pag-ayo ang mga basura nga mahakot gikan sa lainlaing dapit aron buwagon ang mga madugta ug ang dili madugta.

Tinuod, gilatid sa Republic Act 9003, ang Ecological Solid Waste Management Act, nga ang usa ka local government unit (LGU) kinahanglan nga duna g’yuy MRF diha sa tagsa-tagsa nila ka dapit. Dinhi sa dakbayan sa Sugbo, gikinahanglan kini kaayo kay wala g’yud hingpit nga napatuman ang “proper segregation” sa mga basura gikan sa kabalayan.

Napugos ang mga opisyal sa dakbayan sa Sugbo sa pagpahakot gihapon sa mga basura nga gilabay sa katawhan, bisan og wala kini buwag-buwaga ang mga malata ug ang dili malata, kay kon estrikto nga ipatuman ang balaod ug dili hakuton ang mga basura nga wala ma-segregate, mabaho ang tibuok dakbayan.

Ang Cebu City Council nitakda nga mopahigayon og public hearing karong Disyembre 13 aron hisgotan ang plano nga paggamit og luna diha sa karaang Inayawan Landfill alang sa MRF. Apan sanglit aduna may kamandoan gikan sa Court of Appeals nga dili na ipagamit ang Inayawan Landfill, mas labing maayo unta nga mananghid ang kagamhanan sa dakbayan sa Sugbo sa Appellate Court.

Kini aron nga wala’y problema nga paabuton ang mga opisyal sa dakbayan. Kuyaw na kaayo nga tingali’g imando unya sa Court of Appeals nga i-contempt ang mga opisyal sa dakbayan sa pagsupak sa kamandoan sa hukmanan, makasugat sila og dili tiaw nga problema.

Ang contempt of court ra ba, ang huwes maoy gamhanan ug mahimong ipapriso g’yud dayon niini ang mamatud-ang sad-an.