Kaila mo kinsa ni?

Atensyon Guadalupe Barangay Kapitan Michael Gacasan. Mura’g sibaw na man kaayo ang report Kap, nga duna kay konsehal nga nalambigit sa pag-operate og illegal swertres.

Dili hinoon ko motuo dayon sa report nga kakonsabo nimo kining maong konsehal, mentras naghipos pa ko og igong ebidensya. Husto g’yud diay kadtong report nako nga dunay tanod nga maoy mangolekta sa halin sa illegal swertres diha sa Guadalupe.

Kadaghan ba diay sa mga opisyal sa barangay karon nga nalambigit na sa pagpadagan sa illegal nga sugal, kon tuohan nimo ang mga report sa katawhan? Gikatagbo man gud nako ang suod kaayo nako nga higala, ug giangkon niya nga tinuod ang report nga miabot nako.

Siya pa gani dayon ang mitug-an sa ngalan sa mao nga konsehal. Ang report nga miabot nako nga nalambigit ang kapitan, apan usbon nako Capt. Gacasan, dili dayon ko motuo niini pagka karon.

Busa, trabahoa dayon kini Capt, kay siyaro og wala ka g’yud masayod niining tinonto diha sa imong mga sakop. Kon wala kay himoon, magsugod na ko pagtuo sa mga report nga miabot kanako.

* * *

Sa Ermita, hilom na man si Kapitan Imok Rupinta ug ang kapolisan sa Carbon sa pagpangsakmit sa mga video karera, moli-moli, ingon man sa illegal swertres.

Dunay mireport kanako ug nagpahibalo nga grabe na usab kaayo ang pagpamaligya og drugas, ug illegal swertres sa Carbon Market dapit, sa ato pa sa Ermita.

May outlet pa kuno ang illegal swertres diha sa Ermita ug wala kini hilabti sa mga polis. Pag-sure diha uy Sir Chief Inspector Jacinto Mandal.

Giawhag nako ang mga informers nga mopahibawo, sa pagtug-an g’yud sa nahimutangan sa mga illegal activities aron nga makwestiyon nato ang mga polis kon ngano nga wala nila kini aksiyoni. Text mo sa 0943-0766611.

* * *

Nalipay ko kay gibalik na ni Mayor Tomas Osmeña si Raquel Arce isip pangulo sa PROBE Team, ang clearing team sa City Hall, kay wala ni kulba ug motuman g’yud og mando.

Kadtong gipulihan niya nga si Susana Berido, pastilan, wala g’yud ko makadayeg niadto. Palpak sa paghawan sa atong aseras. Kon magpirmi, iniglabay sa katuigan, wala na’y aseras ang siyudad.

Usa g’yud ko sa miawhag ni Mayor Osmeña nga ibalik na lang si Arce sa katungdanan kay nakasabot ko nga bisan kinsa pa ang mayor, kini si Arce motrabaho g’yud. Dili ba ma’am?

Buyno, ayaw’g liguy-ligoy ha?