EDITORYAL - Personal interest

Daghang mga politiko nga alyado sa partido nga kontra ni Presidente Duterte sa niaging eleksiyon, mag-ambahan ugma paingon sa Plaza Independencia aron manumpa nga bag-ong sakop sa PDP-Laban nga maoy partido sa presidente.

Sagad niining mao nga mga politiko nangangkon nga kaayohan sa ilang mga lumolupyo maoy ilang gilantaw ug mao nga molukso sila sa partido sa administrasyon kay aron kahatagan sila og daghang mga proyekto.

Apan dili sila makalimod nga ang labing bug-at nila nga rason pagbalhin sa partido ni Presidente Duterte mao ang kahigayonan nga makasakay sila sa labing lig-on nga politikanhong grupo sa sunod eleksiyon.

Klaro kaayo nga “personal interest” maoy gilantaw niining mao nga mga politiko apan ang katawhan gihimo ra nila nga rason aron pagsalimbong sa ilang kamahimuslanon. Dili katingad-an nga kining mao nga mga politiko molukso na usab unya og laing partido kon dili na si Duterte maoy presidente.

Daghan niining mao nga mga politiko may rekord na nga magbalhin-balhin g’yud ngadto sa partido nga kaalyado sa administrasyon. Sa laktud, kining mao nga mga politiko wala’y baruganan.

Tinuod, dako kaayo ang posibilidad nga kining mao nga mga politiko dad-on gayud sa PDP-Laban kon mopasubli sila sa ilang katungdanan. Nagpasabot nga sila gihapon ang isipon nga lig-ong kandidato kay pabor man sa mga mehoras sa kagamhanan.

Dili tiaw ang problema karon ni Cebu Governor Hilario Davide III kay biyaan man siya sa daghang mga mayor sa kalungsoran sa lainlaing distrito. Nagpasabot nga mangita na usab siya og iyang mga lider nga modala sa iyang kampanya sa mao nga mga dapit.

Angay’ng timan-an sa mga botante ang batasan sa mga politiko nga anaa sa tagsa-tagsa nila ka lugar aron maoy basehan kon kinsa ang ilang botohan sa umaabot nga eleksiyon.