EDITORYAL - Dili magpaulahi

Nagsugod na usab kagahapon ang Commission on Elections sa pagpangrehestro niadtong mga tawo nga nagtinguha nga sila makabotar ug makapili og ilang mga opisyal sa barangay karong Mayo sa sunod tuig. Apan nasubo ang kadagkoan sa Comelec tungod kay maihap ra sa tudlo ang miadto sa ilang opisina.

Ang balaod nga nagpauswag sa eleksyon sa barangay nga gitakda unta kaniadtong Oktubre 23, ngadto na sa ikaduhang Lunes sa buwan sa Mayo karong sunod tuig, naglatid nga ang pagpadayon sa pagpangrehestro ipahigayon sugod Nobiyembre 6 ug matapos kini karong Nobiyembre 30.

Bisan si Election Officer Marchel Sarno sa Cebu City North District miawhag g’yud sa katawhan nga dili nila usikan ang mga adlaw mentras dili pa kaayo daghan ang mga tawo nga mag-ambahan sa lainlaing opisina sa Comelec. Apil sa angay’ng moparehestro mao kadtong mga batan-on nga mahimo na nga 15-anyos sa adlaw sa piniliay aron sila makapili og kandidadto alang sa Sanguniang Kabataan.

Bisan kadtong mga tawo nga botante kaniadto apan natangtang na ang mga ngalan sa listahan sa mga botante kay wala na makabotar makaduha ka higayon, ingon man kadtong gusto nga mobalhin og dapit nga adto sila mobotar. Naglaum ang mga opisyal sa Comelec nga usbon na unta sa katawhan ang ilang bati nga batasan.

Daghan g’yud sa katawhan nga adto na magkara-kara sa pagparehestro kon pipila na lang ka adlaw ang nahibilin, hinungdan nga magdasok na ug mag-ilogay kon kinsa kanila ang matagad dayon sa ilang panginahanglan.

Aron paghatag og higayon nga makarehestro kadtong mga nagtrabaho, ang Comelec bukas gihapon sa adlaw’ng Sabado. Unta, pahimuslan sa katawhan kining kahigayonan ug dili kay adto na sila maglumbaanay pag-adto sa Comelec sa hinapos na nga bahin sa gitaganang mga adlaw.