Discrimination sa mga kalag

To dos los Santos karong adlawa diin gihandom nato ang mga namatay nga nahimong santos.

Samtang ugmang adlawa, mao pa g’yud unta ang tukma nga panahon sa paghandom nato sa atong mga mahal sa kinabuhi nga mitaliwan na sa laing kalibutan.

Apan sa mga dagkong siyudad, bisperas pa lang sa All Saints Day, naghugop ug nagbuntagay na ang mga tawo sa mga menteryo.

Nahinumdom ko sa among probinsiya sa Bukidnon nga Nobiyembre 2 man ang daghang tawo sa menteryo kay mao man g’yud kini ang adlaw sa minatay. Ambot lang kaha kon nausab ba kini karon kay dugay-dugay na pud ko nga wala kauli.

Bitaw, mura’g nakalimtan na man ang importansya sa tukmang petsa sa paghandom nato sa atong mga mahal sa kinabuhi nga nangamatay na.

Gani, mismo ang gobiyerno maoy mihimo niini sanglit gideklarar nga holiday ang Oktubre 31 ug Nobiyembre 1, apan ang Nobiyembre 2, wala na. Pastilan, magprotesta niini ang mga kalag kay dunay discrimination nila ngano nga ang mga santos lang ang gihatagan og holiday samtang sila wala.

Ang All Saints ug All Souls Day gihimo na nga negosyo diin hilabihan ka mahal sa presyo sa bulak. Sa una, yano nga halad sa pagkaon ug dagkot sa kandila ibabaw sa nitso, payts na man, karon pabonggahay na.

Bitaw, bisan unsa’y pamaagi sa paghandom sa mga mitaliwan, ang importante mao ang pag-ampo alang sa kapahulayang dayon sa ilang mga kalag.

Kini ang ilang bugtong gipangayo karon, dili ang mahalon nga bulak ug labaw na nga wala nila kinahanglana ang hudyaka sa ilang adlaw kay makapasamot kini sa pagkabitad nila sa impiyerno.

Busa, himoon nato nga solemne ang adlaw sa mga minatay, kay usa ka higayon lang sa matag tuig sila gihatagan og espesyal nga adlaw, busa ato kining ihatag kanila. Ang mga buhi dili na kinahanglan nga moeksena, ang mga buhi, suloguon lang nila karon ug ugmang adlawa.