Akong magtutudlo, akong bayani!

Gisaulog kagahapong adlawa ang National Teacher’s Day isip pagyukbo sa mga magtutudlo nga maoy nag-umol sa kinaadman nga atong naangkon.

Wala’y mga doktor, abogado, journalist ug ubang professionals kon wala ang mga magtutudlo.

Sila ang ikaduhang ginikanan nato nga nakatampo og dako sa pag-umol sa atong pagkatawo.

Sa dakbayan sa Lapu-Lapu, usa ka santos nga misa ang gipahigayon sulod sa Hoopsdome nga gitambongan sa tanang magtutudlo.

Sa wala pa mahuman ang misa, gibasa nila ang teacher’s prayer, diin nagsentro sa pangaliyupo sa Labaw’ng Makagagahum nga hatagan sila og dugang kaalam aron maagak nila ang mga bata.

Nanginahanglan usab ang mga magtutudlo og igong pasensya ug halapad nga pagsabot sa mga tinun-an nga nagsalig ug nagkuha kanila sa ilang kusog alang sa pagpanglimbasog sa pagkab-ot sa ilang kaugmaon ugma damlag.

Labaw sa tanan nga unta hatagan og kabaskog sa panglawas ang mga magtutudlo aron makasugakod sa pagpas-an sa dakong responsibilidad nga gitahas kanila.

Dakong hagit sa mga magtutudlo ang mausab-usabon nga kinaiya, ilabi na sa mga bag-ong tubo. Kon ang mga ginikanan mismo maglisud sa pagsakay sa uso ug kinaiya sa ilang kaugalingong mga anak, mas labaw pa alang sa mga maestra ug maestro.

Apan gumikan sa gihuptan nga hiyas sa mga magtutudlo, susama sila sa inahan ug amahan diha sa mga tunghaan.

Nahimong gaan alang kanila ang pag-amuma sa mga tinun-an aron mahimong maayong tawo nga kapuslan sa atong katilingban. Mabuhi ang mga magtutudlo!

Akong magtutudlo, akong bayani, saludo kami!